‘Chhiat tawkte thian’ atan mi 100 training tawh

Mizoram District hrang hrang zinga Upscaling of Aapda Mitra Training neihna hmasa ber, Mamit District-ah chuan Training tum hnih neih ni tawhin mi 100 ten training hi an zo tawh a ni.

Chhiatna chi hrang hrang a lo thlen thulha a tul anga puitu tur Aapda Mitra, ‘Chhiat tawkte thian’ ti vuah hi Mizoram District hrang hrang 5-ah kalpui tura ruahman niin a hmasa ber atan Mamit District tan Training hi neih a ni a, Lunglei, Serchhip, Champhai leh Kolasib District-ah te training hi la neih leh tura ruahman niin heng training chhuak te hi chhiatna chi hrang hrang- Leimin, kangmei, tuilian, lirnghing leh thildang a lo thlen thulh ah chi-ai lova vantlang tana a tul anga lawmman phutlet nei lova puitu ni tura beisei te an ni.

Disaster Management and Rehabilitation Department leh Mamit District Disaster Management Authority tangkawpin an buatsaih Up-Scaling of Aapda Mitra hnuaia chhanchhuahna hna thawh dan inzirtirna Batch hnihna ni June 7 atanga 18 chhung khan neih a ni a, Mamit, Phaizau, Dampui, Nalzawl, Zawlnuam, Suarhliap, Thinghlun, Chhippui, West Phaileng leh Tuidam khua atangin thalai mi 67 te telin hemi hmalam hian mi 33 ten a thawh khatna ah training hi an lo nei tawh a ni.

Heng Training chhuakte hian hmanraw (equipment) chi hrang hrang, Personal Floatation Device ( Life Jacket), Torch/ Emergency light (Solar), Safety Glove, Pocket Knife, First Aid Kit, Gas Lighter, Whistle, Water Bottle, Ruck Sack, Thosilen, NDMA Uniform & SDMA/DDMA Uniform, Safety Googles, Safety Helmet, Rain Coat, Gum Boot leh Training Certificate an dawng theuh a ni.