Mizoram-a Oil Depot siamna tura ruahman te a hman theih dawn leh dawn lo zirchianna nei

Mizoram chhunga tuialhthei dahkhawlna (Oil Depot) siamna tur a ruahman Sihhmui leh Bairabi-a ram en mek te chu a hman theih dawn leh dawn loh zirchianna (Feasibility Study) neih tawhna report chu nimin khan Supply Minister K Lalrinliana hovin a Pisa-ah neih a ni.

He thlirhona ah hian Rail-fed Oil Depot siamna tur hian Ram Acre 30-35 a zau leh Railway Siding Full rake (Oil phur Ril wagon 42 dinna tur) atan ram metre 800-a thui awm theihna tur mamawh a nih thu tarlan a ni a. Report-a a lan danin Bairabi-ah hian Half rake pahnih (400 mtr, wagon 21) siam theih a nih thute, a hmun a zawl that thu te ngaihthlak niin, Railtrack (rel kawng) atanga siding panna tur motor kawng National Highway chu bridge (Lei) dawh emaw, leihnuai verh tlang emaw a ngaih tur thu ngaihthlak a ni bawk. Sihhmui-a ram en mekah hian 132 KVA line sawn ngai a awm a, chubakah a ram a zawl that tawk loh avangin ram laih tur leh hnawhkhah tur a tamin Rel leihlawn te pawh dawh a ngaih hmel a, helai hmun panna atan hian kawng sial a ngaih tur thu te pawh ngaihthlak a ni a, a hmun siam rem nan hian sum tam tak sen a ngaih thu ngaihthlak a ni bawk.

Mizoram sawrkar chuan Mizoram-a Oil Depot siam tur hian nasa takin hma a lo la tawh a, Supply Minister hian kumin April 13 khan sawrkar laipui-a Petroluem Ministry Secretary Pankaj Jain chu kawmin ram endik leh zirchhianna rang zawka kalpui turin a lo sawipui tawh a, IOCL Land Selection Committee in tun thla chawhma lamah heng hmun pahnih hi rawn tlawhin, Team panga in Technical Feasibility Study rawn nei leh a, Oil Depot atana ram thlan tur hi tun thla chhung ngeia an tihfel tur thu an sawi a ni.

Supply Minister ho a sawihona neih zawh hian Chief Minister Zoramthanga hova sawiho lehnghal niin, Chief Minister chuan Mizoram-ah Oil Security a awm theihnan theihtawp chhuaha hma la tur in a chah a, Sawrkarin an hmalakna ah theihtawpin a puih tur thu a sawi bawk. IOCL lam hian tun kum chhunga ram lei fel an tum thu leh Oil Depot hi kum 2-3 chhunga an siam zawh theih an inbeisei thu an sawi a ni.