COVID-19 hri kai enkawllai mi 101 awm mek

Mizoram-ah COVID-19 hri kai enkawllai an tlem ve hret hret a, nimin tlai thleng khan hri kai enkawllai mi 101 an la awm a ni.

Niminpiah khan Mizoram-ah Sample enfiah285 awmin heng atang hian COVID-19 hri kai mi 20 hmuhchhuah an ni a, Sample enfiah atanga chhutin za zela 7.02 te chuan hri an kai a ni. Niminpiah-a COVID-19 hri kai hmuh belh te hi Rapid Antigen Test hmanga Sample enfiah 274 atanga hri kai hmuh te vek an ni a, ZMC-a RT-PCR Laboratory-a Sample enfiah 4 leh TrueNat Laboratory-ah Sample enfiah 7 atangin hri kai hmuh belh an awm lo thung a ni.

Nimin khan Mizoram-ah COVID-19 hri kai enkawl dam mi 24 an awm ve leh thung a, heti hian nimin tlai dar 5:00 thleng khan Mizoram a COVID-19 hri kai hmuhchhuah tawh chu 2,28,372 niin an zingah hian mi 2,27,572 te chu enkawl dam an ni tawh a, hri kai hmuh atanga chhutin za zela 99.65 te chu enkawl dam an ni tawh a, hri kai enkawllai mi 101 an la awm a ni. Hetihlai hian nimin chawhnu lam khan COVID-19 hri kai boral awm ve lehin Mizoram-a COVID-19 hri kai zingah mi 699 an boral tawh a, May 13, 2022 hnu lama COVID-19 hri kai boral leh hmasa ber a ni.