Mizoram Lok Sabha MP in PMG NE-I a kawm

Mizoram Lok Sabha MP C. Lalrosanga chuan Post Master General, North East-I Joseph Lalrinsailova chu nimin khan Aizawl Dak Inpui-a a Pisa-ah tlawhin Postal Service chungchanga thil pawimawh hrang hrang a sawipui.

He hunah hian Lok Sabha MP chuan Post Office kaltlanga mipui in thil chi hrang hrang an inthawn thin te a thlen har thin avanga harsatna leh thil pawi eng eng emaw a awm thin chu a ngaimawhawm tih a sawi a, thil dawn mai tura ngaih tlai taka a lo thlen avanga tihtur pawimawh thulh phahna te a lo awm thin hi pumpelh dan ngaihtuah a, hmasawnna lam pan a tul hle tih a sawi a. Delhi leh Aizawl inkar ringawtah pawh thil thawn kalmuang lutuk a ngaimawh avangin a muanna lai nia ngaih Kolkata lam Postal hotupa Chief Post Master General, West Bengal Circle hnenah pawh lehkha ziakin a thawn tawh thu a sawi bawk. Lok Sabha MP chuan Lengpui Airport-a Cargo Terminal awmlo chu a ngaimawh thu leh Cargo Terminal chungchang hi Airport Asst. Director a lo sawipui tawh bakah, a tul angin Delhi lamah pawh bawhzui zel a tum thu PMG hi a hrilh a ni.

He hunah hian Post Master General, North East-I Joseph Lalrinsailova pawhin thil thawn kal muang chu a ngaimawh hle tih sawiin, tunah hian Lengpui Airport-ah Cargo Terminal a awm loh avangin by road-in thil thawn zawng zawng kalpui a ngaih thu leh Aizawl to Silchar-ah ni khat (1) thangin, Silchar-ah ni khat dang an lo dah leh a, chumi zawhah Silchar atanga Guwahati thlen nan kar khat te an hman leh thu a sawi a, chutiang a nih avang chuan Aizawl to Delhi pawh hi kal chak ngaihna a la awm lo tih MP a hrilh a. Hetiang aia chak tura beisei chu Aizawl to Kanhmun, Kanhmun to Agartala, Agartala to Delhi a nih thu leh chutiang tur chuan ruahmanna siam chho mek a ni tih a sawi a, tun ai hian thil thawnte pawh a kal chak zawk turah beisei a ni, a ti a. Aizawl Head Office hmunah bik pawh hian bungrua lo thleng reng reng pawh rei rial lovin a chak thei ang bera pekchhuah zar zar a ni tawh thu te pawh a sawi bawk.

Thil thawn bo chungchang te, parcel chhunga a thawntu in a dah ni miah lo, thil dangin lo thlak thlengte pawh hriat tur a awm thin a, hemi chungchangah pawh a tul anga hmalak mek a ni tih sawiin PMG Joseph Lalrinsailova chuan, Lengpui Airport-a Cargo Terminal a awm loh avanga an harsatna te hriatpuia hma lo laksak ve turin MP chu a ngen nghal a ni. PMG hian MP (LS) C. Lalrosanga thlalak chuanna Stamp an siam thar chu a hnenah a hlan nghal bawk. Nimin-a PMG thar Pisa a tlawhna ah hian Lok Sabha MP hi Telecom Advisory Committee Member HC. Vanlalruata chuan a tawiawm a ni.

Comments

Popular News (Last 30 Days)

LPG man bithliah thar