ASF vanga Vawk suat te zangnadawmna pek tur a hmawr bawk theih tep a ni tawh - Vety Minister

AH&Vety Minister Dr. K. Beichhua chuan ASF hri leng avanga Mizoram-a Vawk suat (cull) te zangnadawmna tur sawrkarin a buaipui mek chu a hmawr an bawk thei tep tawh tih a sawi.

Mizoram Pig Producers' Cooperative Federation (PIGFED) Ltd. Annual General Meeting nimin-a Vety Polyclinic Conference Hall, Aizawl-a neih a hmanpuina ah he thu hi sawiin AH & Vety Minister chuan African Swine Fever leng nasa taka Vawkvulhtuten an tuar chu pawi a tih thu sawiin, he hri leng avanga Mizoram dung leh vanga Vawk suat (cull) te zangnadawmna tur sawrkarin a buaipui mek pawh a hmawr an bawk thei tep tawh tih a sawi a. Amah ngeiin sawrkar laipuia Minister te a dawr thu sawiin, “State leh Central nen 50:50 in zangnadawmna hi kalpui a ni dawn a, sawrkar laipui lam chuan cheng vbc. 5 chuang an rawn pe tawh a, a doletna tur State Sawrkarin a allocate tawh bawk a, tun atanga reilote ah expenditure sanction hmuh a ni dawn,” a ti a ni.

Vety Minister Dr. K.Beichhua chuan PRRS nasa takin a lo leng tawh tih pawh sawiin, “ASF in Mizoram a nuai leh a, vawkvulhtute an lainatawm takzet a, Sa-a intodelh tura hmalakna pawh nasa taka a sukuk ta chu a vanduaithlak hle a ni,” a ti a. Heng vanduaina te hi tawk mahila zam mai tur kan ni lo tih pawh sawiin, ASF thawh khatna nasa takin kan tuar a, thawh hnihna a leng leh mek a, a do hneh tur chuan mi thiam zawkten tih leh tih loh tur thurawn an pek te ngaih pawimawh a tul tih hre thar leh turin mipuite a chah a. State pawn lam atanga Vawk lakluh khap te, ASF avanga Vawk thi an awmin Vawk In chu thla ruk tal tihruah tur tih te leh Vawk hri laka himna tura inkaihhruaina pawimawh dang sawkarin a siam te chu zawm ngei turin mipuite chu a chah nawn leh bawk a ni.

PIGFED hian ASF hripui leng an tuar nasa hle tih he hunah hian tarlan a ni a, Thenzawl-a an Farm-ah Vawk 53 thiin 208 zet suat an ni bawk a. Selesih-a an Farm-ah Vawk 15 an thih bakah 33 suat an ni bawk. ASF avang hian heng an Farm pahniha Vawk an vulhte hi an mang vek a ni. Hetihlai hian sawrkarin PIGFED Ltd. kut-a a dah ranchaw siamna, Animal Feed Plant, Tanhril atangin ran chaw engemawzat an hralhchhuak reng a, hei hian PIGFED sum lakluhna kawngah a pui nasa hle.

PIGFED hi June 6, 1989 khan din niin tunah hian an hnuaiah Society 163 an awm a, he Federation din chhan leh tum bulpui ber chu Vawkvulh leh a kaihhnawih thila member te hmasawnna tura hma lak te, member te zirtir leh kaihhruaina pek te a ni.