Chief Minister in Mizoram Cooperative Apex Bank Annual General Assembly a hmanpui

Mizoram Cooperative Apex Bank Annual General Assembly vawi 27-na chu nimin khan Aizawl-a Vanapa Hall-a neih a ni a, Chief Minister Zoramthanga chuan a hmanpui a ni.

Nimin a Mizoram Cooperative Apex Bank Annual General Assembly-ah hian Chief Minister chuan Apex Bank chu tha taka hna thawk, Scheduled Bank-ah pawh lut mai thei tura chhawpchhuah mek a ni thei chu lawmawm a tih thu sawiin, mipui rawng an bawlna ah theihtawp chhuah zel turin a chah a. Tun hmaa Banking System that tawkloh avanga Cooperative Bank ten harsatna an tawh dan kha hre rengin, a kalphung ah fimkhur zel pawimawh a tih thu sawiin, tha taka bul an tan tawh chu thawktu zawng zawng leh Shareholder zawng zawng ten veng vek turin a chah a ni.

Chief Minister chuan hlawhtling tur chuan a bul taka Cooperative Society in a tum ber kan hriatchian a ngai tih pawh sawiin, Cooperative Society chu a chhunga mite zing atanga insiam chhuaka lo thang chho zelin hlutna neia, Society member-te tan hlawkna lo hring thin tur a nih thu a sawi a. Chutiang ni lova a chhip atanga intan a nih chuan ke neilo in a ding anga, sawrkar Department pakhat ang maia ngaia Grant leh Loan zawnga a kal chuan hun reilote ah a in ei dak ral leh mai thin thu a sawi a. Chief Minister chuan mipuiin kan ramin malsawmna a dawn - lei ngheng a eizawnna, intodelh mai bakah hausakna tham asset a neih hi taima leh remhre taka hman tangkai nachang kan hriat a, hma kan lak pawimawh a tih thu a sawi bawk.

Cooperation Minister C. Lalrinsanga pawhin Cooperative Movement pawimawhna leh he movement hlawhtlinna tur chuan rinawmna leh taimakna a pawimawh thu a sawi a. Inpekna tak tak nen kalpui a ngaih thu leh 'mahni in hlawkna changlo pawh ni ila midang chuan chang rawh se' tih rilru put te, tanrualna leh nasa taka ram tan inpekna rilru put a pawimawh thu te a sawi bawk.

MCAB Ltd. hi kum 40 a upa niin Bank inrelbawlna hi Board of Directors kuta awm a ni a, Board of Directors-ah hian member sawm (10) an awm a ni. Bank Branch 22 awmin, CBS a thlunzawm vek an ni a. Mizo tawnga hman theihna ATM 22 leh Mobile ATM Van 2 an nei a ni.

Comments

Popular posts from this blog