STP in ruihhlo do beihpui kalpui tan turin an hawng

Serchhip Thalai Pawl (STP) chuan Serchhip Town chhunga zirna In hrang hrangah Ruihhlo thatloh zia inzirtirna kalpui tumin nimin, June 27, 2022 khan International Day Against Drug Abuse and Illicit Trafficking denchhenin he beihpuithlak tur hawnna hi neih a ni.

Govt. Higher Secondary School, Serchhip-a Drug Awareness Campaign hawnna hi STP President T. Biakchamliana chuan kaihruaiin tunhnaiah thalaite zingah ruihhlo, a bik takin Heroin No. 4 ti an tam avangin hetianga beihpuithlakna hi neih an tum tih a sawi a, hemi atan hian Serchhip DEO-ah phalna lain zirna In hrang hrangah a tahtawla hun hman tum niin ruihhlo leh HIV/AIDS chungchang inzirtrina neih tum a nih thu a sawi a, hei bakah hian STP ten mi harsa zawkte tanpuina kawnga hma an lo lak tawhna leh Environment humhalhna tura hma an lakna te a tarlang bawk a ni.

STP te hmalakna a ‘Drug Awareness Campaign’ hawnna hun nmin-a neih ah hian Resource Person atan Serchhip District Hospital ICTC-a Lalnuntluanga Renthlei chu hman niin Ruihhlo chi hrang hrang, a bikin Heroin No. 4 hmansual pawi theih dan te, heng ruihhlo ti thin zingah HIV/AIDS kai an tam theih dan leh tih chhin loh chu ruihhlo hmansualna laka invenna kawng tha ber a nih thu te ngaihthlak a ni a, zirlai te hnenah heng chungchanga inzirtirna thuziak chi hrang hrang semchhuah a ni bawk.