Cheng vbc. 180 senna tur Prepaid Smart Meter Project

Sawrkar laipui a Ministry of Power atangin, Revamped Distribution Sector Scheme (RDSS) hnuaiah, Power (kawlphetha) semzaina kawnga Mizoram harsatna phuhrukna tur project leh Mizoram a Prepaid Smart Meter Project kalpuina tur cheng vbc. 410 bawr vel hmuh a ni dawn a, chumi atan chuan Project Management Agency (PMA) pawh thlan fel tawh niin, chung project te chu kum 2025-2026 a zawhfel tur a ni.

Power & Electricity (P&E) Secretary H. Lalengmawia sawi danin, RDSS hnuaia Mizoram in a hmuh tur 'Prepaid Smart Meter Project' cheng vbc. 180 senna tur chu sawrkar laipuiin a approved tawh a, project pakhat zawk erawh approved la ni chiah lo mah se, reilote-ah a fel theih rin niin, chumi atan chuan cheng vbc. 230 bawr vel hmuh beisei a ni. 

P&E Swcretary sawi danin, Project pahnih-ah PMA atan Medhaj Techno Concept Pvt. Ltd thlan fel tawh an ni a, project thawh turte chu PMA kutah a awm dawn a, State sawrkar inrawlhna tur chu Financial Control deuh chauh niin, a system a tha hle dawn a, PMA in contractor thlangin an vilzui ang. PMA tur a rawih te chu tha leh rintlak tura ngaih an ni a, India ram State 8-ah Mizoram-a an thawh tur ang thawk a rawih lai mek an ni. Power semzai na kawnga Mizoram harsatna phuhrukna tur Project hian Power Line, Transformer, Sub-Station leh pawimawh dang tam tak a keng tel dawn tih P&E Secretary chuan a sawi bawk.