Latest News

Bawrhsap in leimin vanga chhiatna thleng a tlawh

Tunhnai ruahsur nasa vanga Serchhip leh a chhehvela leiminna hmun hrang hrangte chu nimin khan Serchhip District Disaster Management Authority (DDMA) Chairman leh District Bawrhsap Nazuk Kumar IAS chuan a hmunah a tlawh.


Bawrhsap hian Chhiahtlang atanga bul tanin Chhiahtlang NH-54 By-pass Road Retaining Wall chimna laite, Serchhip leh Chhiahtlang inkara kawng laihzauh vanga leiminna te enin hemi hnu hian Serchhip P&E Veng-a leiminna hmun te, Serchhip Dinthar Veng-a NH-54 kawngpui tlahniam thar te leh Dinthar Veng hmun thenkhat panna leimin in a hnawhpin te, Darnam Veng-a Telecommunication Tower panna kawng laihna leivung tawlhin NH-54 a hnawhna hmun te leh he leimin vanga In thiah tak hmunte a tlawh a. Sailiamkawn-a Horticulture Department Warehouse leh Cold Storage sira leiminin an Power line a tihchhiat te, an Warehouse building dinhmun him lo deuh nia langte a en bawk a ni.


Heng harsatna thlenna hrang hrangte hi a tam zawk chu NH-54 laih zauh hna thawh mekin a nghawngte an nih hlawm avangin Bawrhsap chuan NHIDCL hotute chu a rang lama a theih ang ang thianfai turin a hrilh a, chawp leh chilha a invenna hna thawh theih ang angte chu a ranglama umzui a nih tur thu sawiin, Horticulture Department Warehouse bik chu Horticulture hotute nena hmalak zui zel dan tur sawiho a tum thu a sawi bawk a. Silpauline a khuh hul tulna hmun te hnenah Silpauline an pe nghal bawk a ni.

Comments

Popular News (Last 30 Days)