A dawnthleng tha kan nei tur hi a lawmawm

A dawnthleng tha kan nei tur hi a lawmawm

- Sawma Pa

Govt. Serchhip College hi Mizoram College Campus hmunhma tha ber pawl a ni a; sawrkarin College ti changtlungin ti lian dawn pawh ni se, an hmunhma neih hian a la zo khawp mai. Chutih laiin, hmun danga College thenkhatte hi chu tihlenna tur sum pawh awm se, an hmunin a zawh tawh loh hrim hrim avanga tih len belh vak ngaihna awm lo hi an awm nawk tawh ang.

Ram laili-ah kan awm a, nakinah chuan kan College hi Mizorama College pan hlawh ber a la ni thei dawnin a lang a; chumi tur chuan a hmunhma hi chuan theihna a nei a, tunah pawh NAAC-ah chuan Mizoram-ah an champion tawh phawt a ni. College dangte tih ve ngai loh thilah hma thar an la reng bawk a, tun anga hma an sawn chho zel a nih chuan nakin lawkah chuan Zoram dung leh vang mai bakah, State pawn atang thleng pawhin zirlaite'n an la rawn bawh hum hum lo ang tih a sawi theih loh. Tun apangin sawrkar tan pawh ngaihsak loh theih lohin an awm tan tawh a, Chief Minister pawhin an mamawh em em Administrative Building sakna tur chu phal takin a pe nghal pang mai.

Tunah hian District Hospital sakna tur hmun atan Bukpui ram sam fai a ni a, a lawmawm khawp mai. Tuna kan Hospital awmna sa hi tun dinhmunah chuan mipui tan pan a nuam zawk ngei ang; mahse, nakin hun tur thlirin, hmun dang Hospital-te changkan ruala changkan ve zel, than ve zel kan duh a nih chuan a hmunhma tha leh zau zawk kan neih hi a tul tawh hle a ni. Kan Hospital hmunhma-in kan duh thu a sam loh avangin Lawibual ramah te sawn kan tum uaih uaih tawh a; mahse, a rem leh ta lo mai pawh a. Kan hmunhma in a zir loh avangin tunah pawh District dang Hospital building neih ang pawh kan nei pha ta lo a nih hi.

Kan Hospital ram hi damdawi In sakna atan chuan a la zau, khum 100 awmna chu a la leng kan ti a, khum 100 leng ngawr ngawr chuan sak a har lo khawp ang. Amaherawhchu, building dang thiah rem si lote a awm nawk tawh a, a hmun ngaia sak a nih dawn chuan a tawt sa tûna sak a ngai dawn a ni. Health Department ram pumpui hi la ruak vek chu ni se, ruahmanna fel tak nen nuam takin a la sak theih tih a chiang a; mahse, tunah chuan chu chu a theih tawh si loh a ni. Hospital building pawh hi a sakna tur hmunah hian tihlen belh hleih theih tawh loha sak a ngai dawn sa tih a chiang a ni.

Tuna Hospital building thar dahna tur hi a panna a hla tih hi tun dinhmun kan thlir vang niin a lang a, NH-54 an siam zawh hunah chuan Baktawng, Khumtung, Thingsul atang pawhin an rawn thleng zung zung thei dawn a; Zemabawk leh Aizawl Civil Hospital inkar te, Kulikawn atanga Falkawn inkar ngaihtuah phei chuan tuna kan damdawi In awmna leh Bukpui ram chu inhnaih hleih tak a la ni.

Tuna kan damdawi In pantute pawh a tam zawk chu lirthei hmanga pan khawm kan ni a, a panna thu ah hi chuan harsatna kan neih ka ring chiah lo. Hospital hi a ngaiah sa ta ila, kum 5/10 chhungte chu kan la inhnawh ve naw naw thei ngei ang; mahse, nakina mamawhna avanga tih len a tul hun a lo thlen hunah chuan a khirh talh tawh dawn.

Hospital hran din belh te hi pawisa awm vanga tih mai theih ni lovin a lang lehnghal a; chuvangin, “A hmun ngaiah chuan a chep tawh em mai a, a hran din a ngai a ni,” kan tih hun lo thleng ta se, thil a khirh talh talh tawh hle ang. Chutih hunah chuan, Hospital building sakna tur ram ruak, zau tha si hmuh tur a vâng tawh viau mai thei. Damdawi In building chu sak theih mah se, a ken tel tur building sakna a awm lo tih te chu harsatna awm turah ka ngai lo. Damdawi In building a awm chuan sawrkar tan pawh a kentel tur sakna tur ngaihtuah hi thil har a nih a rinawm loh; Central sum sawichhuahna atana hman pawh a nuam zawk hial ang. Tin, World Bank sum hmangin damdawi In thawmthatna tur leh quality tih chakna tur hi thla 3 danah cheng nuai 10 zel, kum 5 chhungin kan hmu dawn a; he project hi kalpui tan mek a ni bawk. Hemi hmang hian thil tam tak kan siam belh theiin a rinawm a, damdawi In sawn kan tum hun hi a fuh chiah niin a lang.

Tuna damdawi In hmun thar turah hian Helipad pawh a siam tel theih tih te sawi a ni a, hei hi hmunpui zawka damlo refer ngaite leh hmun dang atanga Serchhip damdawi In-a panpui hmanhmawh ngaite tan a tangkai khawpin a rinawm. A hmunhma a zau tha a nih phei chuan, damlo te tana zing leh tlai kara hawi thawvenna tur hmun Park a siam tel theihte phei chuan duhthusam a ni lehzual.

Tun ang hian Doctor indaihloh leh hmanraw neih that loh bik hi kan nei reng kher lo turahte pawh ngai ila; Specialist Coctor chikim kan neih theih a, khawl changkang leh tha leh a hmangtu tur mithiam kan neih tel vek hunah phei chuan, ram laili, Zoram chhim leh hmar atanga panna hla lova awm, hmunhma tha si hian kan khaw tan malsawmna lian tak a la thlen ngeiin ka ring. Tin, a hmunhmain a zawh chuan kawng hrang hrangah tih changtlun leh tih len belh zel dawn pawhin chance kan nei tha dawn a, State sawrkar leh sawrkar laipuiin mipui hriselna kawnga hmalakna tur Scheme a siam thar rengna kawngah hian a dawnthleng lo neih that hi a dawnthleng zim ai chuan a tha zawk hrim hrim tura ngaih a ni.

Damdawi in hmun hma tharah, ruahmanna felfai tak nena bul tanin inrem chho ila, kan chhehvel mai ni lo, ram pawn atanga an rawn pan chak khawpa damdawi In nuam leh hahdamthlak neih tumin mipuite hian ngaihtuahna i sêng teh ang u.

Comments

Popular News (Last 30 Days)

Vawiin-ah HSSLC Exam result

LPG man bithliah thar