Tourism Department in Post Covid Strategy changtlung tak a buatsaih - Tourism Minister

Tourism Minister Robert Romawia Royte chuan Mizoram Tourism Department in Post Covid Strategy changtlung tak buatsaihin rampawn leh India ramchhung atanga zin mite hipna tur ruahmanna hrang hrang a siam chho mek zel tih a sawi.

India zalenna kum 75-na lawmna, Azadi Ka Amrit Mahotsav (AKAM) kal zelah North East Festival nimin-a hmanah Mizoram Sawrkar Planning & Programme Implementation Department leh Tourism Department chuan Sawrkar Laipui Ministry of Development of North Eastern Region leh North Eastern Council te nena tangkawpin ‘Untapped Eco-Tourism Potential’ tih thupui hmangin Aijal Club RB McCabe Hall ah Round Table Discussion buatsaih a ni a, he hunah hian Tourism Minister Robert Romawia Royte chuan Mizoram Tourism Department chuan Tourism hmasawn nan nasa takin hna a thawk tih sawiin, COVID hripui len vanglai pawha chawl lovin thawktuten hna an thawh thu leh India ram-a a hmasa ber ni turin ‘Responsible Tourism Policy 2020’ bakah a kaihhnawih inkaihhruaina leh dan leh dun te an duangchhuak tih a sawi bawk.

Tourism Minister chuan Tourism subject in a huap zau zia sawiin, Mizoram chuan Sports leh Adventure Tourism lamah hmabak eng tak a neih thu a sawi a, State dangte neih ve loh Motosports Racing Track, Lengpui Airport bulah siam tum a nih thu leh Rural Electrification Corporation (REC) atangin a siamna tur sum cheng vbc. 7.5 hmuh a nih thu a sawi bawk. Tourism Minister hian Tourism Department website thar ‘mizoramtourism.com’ leh ios leh android app thar a tlangzarh nghal a. Smartphone app hi mizoramtourism.com atangin download theih a ni.

He hunah hian Mizoram Chief Secretary Dr. Renu Sharma chuan Mizoram Sawrkar Tourism Department in khualzin mite hip thei tura hma a lak dan hrang hrang a tarlang a. Environment humhalh chunga zin miten an tlawh theih tur, mihring khawih danglam loh, Khuanu duansa hmun mawi leh ennawm tak tak Mizoram chhunga awm te chu Eco-Tourism tihlar nana thil tangkai tak a ni dawn a, uar lehzuala Eco-Tourism promotion-ah tanlak a ngaih thu a sawi bawk.

Nimin-a Round Table Discussion-ah hian Tourism Director V.Lalengmawia chuan Mizoram Tourism chanchin, hmalakna leh hmachhawp te chipchiar takin a sawi a. AKAM NEC Nodal Officer R.Lalrodingi pawhin NEC kaltlanga sawrkar laipuiin hmasawnna hna a thawh dan a sawi a. Kum 17 chhungin NEC chuan Mizoram tan project 160 a sanction a, heng project te atanga sum pekchhuah zat belhkhawm chu cheng vbc. 1378.99 a nih thu a sawi bawk.