Khawnvartui lakluh man san vangin quota tawp mai thei

Mizoram tana Khawnvartui la luttute páwl, Mizoram SKO Dealers Association (MSDA) chuan tunhnaiah nasa taka Khawnvartui man a san avangin sawrkar laipui atanga Mizoram in chan (quota) a neih chu tàwp mai thei a nih thu an tarlang.

MSDA thuchhuah chuan, “Khawn-vartui (SKO) rate central sawrkarin a rawn tih to tâk vak avanga sawrkar ruat Retailer-te'n khawnvartui mipui-a sem tur an khul theih loh avangin Mizoram quota phurh hhuahna lamah harsatna nasa tak kan tâwk a, March leh April 2022-a Mizoram quota pawh phurh mumal theih a ni lo. Kan harsatna tawh mek hi sutkian a nih loh chuan central sawrkar atangin Mizoram quota pum hi tàwp thei mai dinhmunah kan ding reng a ni tih mipui kan inhriattir a ni,” an ti.

MSDA President K. Lalnghakliana chuan, Mizoram quota-a khawnvartui an lakluh man chu a lêt chuangin tunhnaiah a pun thu a sawi a ni. Mizoram sawrkar hnuaiah State quota-a khawnvartui la luttu tur SKO dealer hi engemaw zat an awm a, Private Dealer paruk/pasarih vel awmin, a bâk zawng chu MIZOFED an ni.