Kolasib District Skill Committee thutkhawm neih a ni

Kolasib District Skill Committee chu nimin khan thukhawmin thalai ten eizawnna tlak thiamna an neih theih nana District Office hrang hrangten ruahmanna, ‘Special Project’ cheng nuai 200 hu chu May ni 15, 2022 chhunga thehluh a ngaih thu tarlan a ni.

Kolasib DC Conference Hall-a Kolasib District Skill Committee thutkhawm hmasa ber ah hian District Bawrhsap leh an Chairman John LT. Sanga chuan thalai zinga thiam thil nei an tamna ram apiang chu ram intodelh leh hmasawn chak an nih thu tarlangin, ziak leh chhiar thiam tamna ram, Mizorama thalaite tan hian eizawnna tlak thiamthil nei tura inchher nan leh an thiamna tihpun nan Ministry of Skill Development & Entrepreneurship hnuaiah District Skill Committee din a nih thu a sawi a. Mahatma Gandhi National Fellow-ten hun engemaw chen Kolasib District-a thalai ten eizawnna dapna kawnga an mamawh leh tlakchham an neihte zirchianna an kalpui thu leh District Office-te nen tangkawpin ‘Skills Acquisition & Knowledge Awareness for Livelihood Promotion’ kaltlangin ‘District Skill Development Plan’ duan thuai a tul thu a sawi bawk a ni.

He hunah hian Mahatma Gandhi National Fellowship-a Fellow Pallavi Dhiman-i chuan Kolasib District chhunga ‘Skill & Entrepreneur’ chungchanga an zirchhuah tawhte tarlangin, District Office hrang hranga thalaite thiamna tihpun kawnga hmalak dan tur sawihona neih a ni a. Kolasib district chhunga thalaiten eizawnna tlak thiamna an neih theih nan Ministry of Skill Development & Entrepreneurship hnenah cheng nuai 200 thleng ‘Special Project’ duan a thehluh tur a nih thu tarlan a ni.