School Education Director in Serchhip District-a Zirtirtu leh Zirtirtu pawl aiawhte a kawm

School Education Department Director Dr. H. Lalthlangliana chuan zan khat riak turin nimin khan Serchhip a rawn tlawh a, School Education Department hmunhma te tlawhin zirna In hrang hranga hotute leh Zirtirtu pawl hrang hrang aiawhte a kawm bawk.

School Education Director hian Serchhip Town chhunga zirna In thenkhat tlawh hmasa in Serchhip DEO Office leh SDEO Office te a tlawh leh a, hemi hnu hian Serchhip BRC Hall-ah Zirtirtu leh Zirtirtu Pawl aiawhte kawmin School Education Department Director hna a chelh hnuah zirna In ten harsatna an neih te a hnena thlen turin harsatna te a awm theih avangin amah ngei zinchhuakin an harsatna te a hmuna ngaihthlak sak tura rawn kal a nih thu a sawi a. Kan dinhmun thlirin sum leh pai awlsam hun a awm tak tak dawn lo tih sawiin, hei vang hian sawrkar in a tih sak theih aia anmahni tih theih lam ngaihtuah thin turin he huna tel Zirtirtute chu a chah a. Sawrkar hnathawk tan a theih dan hram zawn thin a pawimawh thu sawiin, naupangte enkawl dan ah pawh a theih dan hram zawn chu hnathawh dan phung ah nei turin a chah bawk.

School Education Department Director chuan Mizoram-ah sawrkar School ten Mission School te an phak loh thin thu pawh sawiin, hei hi a chhan ber chu Mission School a thawk ten Missionary rilru pu-a hna an thawh thin vang a ni pakhat tih a sawi a, hei vang hian sawrkar School a thawk Zirtirtu chu Missionary rilru leh neitu thinlung pu chunga hna thawk turin a chah a, sawrkar hna an thawhna ah anmahni lungawina khawpa hna thawk turin a chah bawk a ni.

Hei bakah hian School Education Department Director Dr. H. Lalthlangliana chuan zirtirtu ten ACR chungchanga harsatna an tawh thin sutkian tuma hma an lak thu pawh sawiin, kumin March 31 atanga chhiara kum 5 kalta chhung a mi kha tihfel tum a nih thu a sawi a. Hemi atan hian zirna In hrang hranga hotute chu an staff te chu thehlut tura lo hriattir turin a chah bawk.

He hunah hian Zirtirtu pawl hrang hrang aiawhte chuan harsatna leh rawtna an neih te Education Director hnenah hian thlenin inkawmna hun an hmang zui bawk a ni.