National Level Survey-in Mizoram sawrkar hmalakna thatzia a tarlang - Health Minister

Health Minister Dr. R. Lalthangliana chuan sawrkar laipuiin tehfung hrang hrang hmanga a endikna (National Level Survey) chuan Mizoram sawrkar hmalakna that zia a tarlang niin a sawi.

Ministry of Health & Family Welfare, New Delhi leh Gujarat sawrkar tangkawpin an buatsaih ni 3 chhung awh 14th Conference of Central Council of Health and Family Welfare (CCHFW), Tent City, Kevadia, Gujarat-a neih Inrinni-a a hmanpuina ah Health Minister Dr. R. Lalthangliana chuan Mizoram sawrkarin hriselna kawngah hma a lak dan chungchang sawiin, Sub-Centre Health & Wellness Centre tha taka kalpui a nih thute, ASHA/Health Worker te hnathawh dan, damlote kalchilha nau chhar thlenga an thawh dante a sawi a, thingtlang kilkhawr ber ber thlenga an fanchhuah thin thu leh damdawi In awmlohna hmunah an tangkai zia a sawi a. Sawrkar laipuiin tehfung hrang hrang hmanga a endikna (National Level Survey) hian Mizoram sawrkar hmalakna that zia a tarlang tih sawiin, “NITI Aayog in kum 2017 atanga endikna a kalpui khaikhawmna ‘Healthy States, Progressive India’ ah Mizoram chu State te ho (Smaller states category) zingah pakhatna a ni,” a ti a. “Infant Mortality Rate (naupiang 1000 zela thi zat) ah phei chuan kan chhuanawm hle a, kum 2009-a IMR 36 ni kha kum 10 hnu, 2019-ah chuan 3 ah a tla tawh a ni,” a ti.

State danga awm ve lo Health Clinic pawh Mizoram sawrkarin a ruahman thu sawiin Health Minister chuan, “Tun dinhmunah Health Clinic 200 vel kan nei a, neih belh zel turin hma kan la mek a ni,” a ti a. Health Clinic chu Health Sub-Centre ang deuh a kalpui a nih thu leh, Health Worker pakhatin a enkawl thu te, Khua/Veng pakhat chin an huam tir thin thu leh khawtlang hotute nen inrawntlanga hmalak a nih thin thute a sawi a ni.

Mizoram in COVID-19 hripui dona kawngah kan titha ni a min sawi chhan chu mi zawng zawng kan tanrual vang a ni tih pawh sawiin, “Sawrkar department hrang hrang bakah Tlawmngai pawl te, Sakhaw hrang hrangte bakah Private Doctor leh damdawi In te nen kan tang tlang a, mipui in min thlawp tlat avangin kan che tha a, hetiang hi hmun dangah a awm ve loh avangin sawrkar lian leh ram ropui tak takte pawhin an tawrh nasat phah a ni,” a ti bawk.

Central Council of Health and Family Welfare (CCHFW) hi India Constitution Article 263 tlawhchhana din niin, India ram chhunga Hriselna (Health) kawnga sawrkar hmalakna chungchanga inrawnkhawmna sang ber a ni a. He hunah hian Ministry of Health & Family Welfare a mi pawimawh te bakah State tina Health Minister, Health Secretary leh National Health Mission-a Mission Director te an tel a, Health lampanga Policy khawih pawimawh tak tak rel tura chhawpchhhuah a ni bawk.

Comments

Chhiar Hlawhte