Kolasib-a neih KTP Gen. Conference a tiak ta

Mizoram-a Kohhran thalai punkhawmna lian ber KTP General Conference vawi 59-na Kolasib Diakkawn Field-a neih chu nizan khan a tiak ta a, he khawmpui hmanga kal Palai te chuan Vawiin hian mahni khaw lam an pan ang.

Kumin a KTP General Conference-ah hian khual atanga Palai kal 9015 an awm nia chhinchhiah a ni a, Inrinni khan Central KTP hruaitu tur mi 25 thlan an ni bawk. KTP General Conference hma hian Synod chuan Central KTP Leader atan Rev. Dr. F. Pachhunga leh General Secretary atan Upa Rochungnunga, College Veng, Aizawl te an ruat tawh a ni.

KTP General  Conference neih zawh takah hian Inrinni khan rorel inkhawm neih a ni a, tun tumah hian General Agenda 10 chhawp-chhuah a ni a, Central KTP Leader Rev. Vanlalmuanpuia Khiangte chuan rorel hi a kaihruai a. Kumpuan thupui-ah Kawlkulh Bial rawtna “Tawngtai tam” tih chu pawm a ni a, Kohhran Humhalh Chungchang inzirtirna neih te relin, Neih inang inkawp chungchang inzirtirna kawnga hmalak rawtna bial panga (5) atanga lut chu Kohhran hmalak mekna anih angin a hrana rua-hmanna siam a ni lo a. Myanmar raltlan chhawm-dawlna chungchang pawh Synod hmalakna anih avangin a hrana hmalak loh te an rel a ni.

Heng bakah hian Synod Hospital Charity Fund pualin Thawhtanni zan thalai inkhawmah thawhlawm vawi khat lak-khawm nise tih te, Youth Recreation Centre (YRC) puala Member tina khawn thin chu mimal anga khawn titawpin, Bial-ah Budget siam a ni ang tih te an thurel zingah a tel a, kum 2026 KTP General Conference thlengtu turin Saitual thlan niin kum 2024 KTP General Conference chu Ratu-ah neih a ni dawn thung a, kum 2022-2023 Budget atan Rs. 66,10,000/- an pawm bawk.

Comments

Chhiar Hlawhte