Mizoram-a Jail 10-ah mi 1,388 tang mekin damchhung tang tur mi 49 an awm

Mizoram District hrang hrangah Jail 10 awm mekin heng ah hian mi tang 1,388 an awm a, an zingah hian damchhung tang tur mi 49 awmin Prison Department hotute chuan Mizoram-a Jail hrang hrangte chu a theih ang anga thuamthat tum mek a nih thu an sawi bawk.

Prison Department hotute sawi danin Mizoram-a Jail 10 awm mek te hi Aizawl-a Central Jail leh Central Women Jail te bakah District 8-a District Jail te an ni a, heng ah hian tang mi 1,388 awm mekin an zinga 1,223 chu mipa an ni a, midang 165 chu hmeichhia an ni thung a, tun dinhmuna mi tang awm mek zinga 876-te chu an thubuai Court-a ngaihtuah lai mekte an ni a, mi 213-te chu thubuai lian tham, hremna pawh na tak dawng tura thiamloh chantir tawhte niin, mi 244-te chu thubuai tenau deuh, hremna pawh nep deuh zawk dawng tura thiamloh chantir tawhte an ni. Jail tang zingah hian damchhung (lifer) tang tura thiamloh chantir (convict) tawh mi 49 awmin an zingah hian hmeichhia pakhat a tel a, damchhung tang tura thiamloh chantirte hi tualthat an ni deuh vek nia thudawn a ni bawk a. Damchhung tang tura thiamloh chantir tawh mi 48-te chu Central Jail, Aizawl-ah tantir an ni a, hmeichhe pakhat chu Central Women Jail-ah tantir a ni thung.

Mizoram-a Jailt e zingah hian Central Jail chu tang tamna ber ni mekin mipa 639 an tang mek a, District Jail Champhai-ah mi 140 tangin District Jail Lunglei-ah 128 leh Central Women Jail-ah mi 120 an tang a, heng te hi tang tam zualna Jail te an ni.

Prison Department hotute sawi danin Mizoram-a Jail hrang hrangah hian naupang, mipa pahnih leh hmeichhia pali awm an awm mek bawk a, heng mite hi thil tihsual an neih avanga tang ni lovin nu leh pa te an tan avanga tang an ni a, Central Women Jail (CWJ)-ah naupang pali awmin District Jail, Lunglei leh District Jail, Champhai-ah pakhat ve ve an awm a ni.

Prison Department hotute chuan Mizo-ram-a Jail hrang hrangte chu a theih ang anga thuamthat tum mek a nih thu sawiin, ei leh in lam bakah thuamhnaw/mutbu etc. lamah pawh an phak tawk a thain ruahmanna an kalpui mek zel tih an sawi a ni.