Mizoram-ah ruihhlo hmansual vangin mi 1,697 thi tawhin kumin-ah mi 4 an thi tawh bawk

Mizoram-ah kum 1984 atanga kumin April thla thleng khan ruihhlo hmangsual vanga thi mi 1,697 an awm tawh a, kumin bikah ruihhlo vanga thi mi 4 awm tawhin, ruihhlo vanga thi an tlem chhan hi COVID-19 vanga hun rei tak chhung Total Lockdown (inkharkhip) nghawng ni thei a ngaih a ni.

Excise & Narcotics department (END) chhinchhiah danin, kum 1984 atanga kumin April ni 28 thlenga ruihhlo vanga thi zingah mi 1,495 te chu mipa niin, midang 202 te chu hmeichhia an ni a, chhinchhiahna atanga a lan danin kum 1998 atanga kum 2004 inkar chhung kha Mizoram-ah ruihhlo a hluar vanglai leh thihpui an tam hunlai niin kum 2004 kha damdawi hmansual vanga thi chhinchhiah anih atanga thi an tam ber kum a ni a, hemi kum hian mi 143 zet damdawi hmansual vanga thi an awm a, kum 2005 atangin ruihhlo hmansual vanga thi hi tlahniam ve leh hret hretin kum 2015-ah phei chuan ruihhlo hmansual avanga thi hi mi 27 chauh an awm a, amaherawh chu kum 2016 atangin a pung leh hret a, kum 2020 khan mi 67 zet thiin nikum 2021-ah khan tlahniam leh hretin mi 47 an thi leh a, kumin ah mi 4 thi leh tawhin kumin chhunga thi te hi mipa 3 leh hmeichhia pakhat niin kum hmasa lam aiin damdawi, ruihhlo hmansual vanga thi hi an tlem a, tunhnai chho-a Mizoram-a ruihhlo hmansual avanga thi te zinga a tam ber te hi Heroin No. 4 hmansual vanga thi te an ni.

Excise & Narcotics Department hotute chuan kumin bika ruihhlo vanga thi an tlem nachhan chu nikum leh kum hmasa lamah te hunrei tak chhung Total Lockdown puan nghawng a ni thei tih zawhna chhangin an sawi a, Total Lock-down chuan ruihhlo ti mite pawh a nghawng lo thei lo a, hemi vang hian kumin ah pawh kum dang ai chuan ruihhlo vanga thi an tlem nia ngaih a ni tih an sawi a ni.

Tunlaiin ruihhlo (Heroin) erawh man tur a tam hle tih Excise & Narcotics Department hotute chuan an sawi a, “Mizoram-a ruihhlo zawrh rawn risk an tam lutuk a, ruihhlo kawngbo te pawh kan ti hial tawh, vanneihthlak takin demand a sang lo hlauh niin a lang a, a lawmawm hle,” an ti a. Lockdown lai khan a tira an hlauh chu OD an tam viau emaw, after shock an tam viau ang em tih a nih thu sawiin, amaherawh chu an hlauhthawn ang erawh a ni lo tih an sawi a ni.