Mizoram Assembly kum 50-na pualin Exhibition nei

Mizoram Legislative Assembly Golden Jubilee (1972-2022) lawmna puala buatsaih ‘Golden Jubilee Exhibition’ chu nimin khan neih tan niin tunkar Zirtawpni thleng mipuite tan tlawh theih a ni ang.

District Council hunlai atanga Vawiin thlenga Assembly kaihhnawih thlalak hlui leh thildang chi hrang hrang phochhuahna ‘Golden Jubilee Exhibition’ hi Assembly Annexe building-ah neih niin Deputy Speaker Er. Lalrinawma chuan he Exhibition hi a hawng a, May ni 6, 2022 (Zirtawpni) thleng khian zirna In (Institutions) leh mipui (public) a tlawh duh apiangte tan hawn a ni ang.

Kum 1952-ah Assam State hnuaiah Lushai Hills District a lo piang a, a hnuah Mizo District Council ti-a hming thlak niin Union Territory a nih thlengin District Council term 4 a awm hman a. Kum 1972-ah Mizoram chu Union Territory-ah hlan kai a ni a, Assembly Session hmasa ber chu May 10, 1972 ah neih a ni. MLA thlan 30 leh Nominated 3 awmin an vaiin member 33 an ni a. UT nih chhung hian inthlanpui tum 4 neih hman a ni a, February 20, 1987 atangin Mizoram chu State puitling a lo ni ta a, member pawh 40 thlan a lo ni chho ta a, Nominated Seat awm tawh lovin State puilting nih hnuah inthlanpui tum 8 a awm tawh a ni.

Mizoram Legislative Assembly hian May 10, 2022 khian kum 50-a upa a lo ni dawn ta a, a tir atanga chhiarin MLA 232 an awm tawh a, chung zinga mi 92 chu boral tawhin kum 50 chhung hian Assembly Session vawi 138 neih ni tawhin, Sitting vawi 955 neih a ni tawh a. House-ah Government Bill 488 lut tawhin 477 passed a ni a, Private Members Bill 5 lut tawhin pass loh vek a ni a, Assembly Committee hrang hrang ten a vaiin House-ah Reports 500 chuang an present tawh bawk a ni.