Leilung leh nungcha tana thil tha lo thlen pawi ti

ZPM Party chuan kan ram hmasawnna hnathawh in kan leilung leh nungchate tana thil tha lo a thlen chu pawi an ti takzet tih an sawi.

Nimin a thuchhuah an siamah ZPM General Hqrs. chuan tunhnaia kan ram hmasawnna hnathawh, NHIDCL kawng laihna leivungin kan ram lui a tihchhiat chu an ngai thutak hle tih tarlangin, Ram hmasawnna leh khuarel leilung Dân chu inbuk tawk, chhuan lo la awm zel tur te tana daihrei (sustained) taka kalpui tur a nih laiin, hetianga kan ram hmasawnna hnathawh in kan leilung leh nungchate tana thil tha lo a thlen chu pawi an ti takzet tih an sawi a. Hmun thenkhatah chuan Ram neitute leh VC ten uluk taka ngaihtuahna sengin leivung paihna (Spoil Bank) tur hmun pein buaina awm thei atan an lo in hmakhua tih an sawi a. Leivung hi awmze neia sawngbawl a nih loh chuan kan environment-in a tuar a, mi tam tak harsatna thlentu, buaina thlentu a ni thei tih pawh sawiin, ZPM chuan hei hi hriain, Policy-ah fel takin leivung sawngbawl dan (leivung management) an dah thu leh tangkai taka hman dan an ngaihtuah thu an sawi a. Mizoram sawrkar in a din Roads and Infrastructure Development Board chu kawng siam avanga ram mipuite, leilung, thing leh mau leh nungchate harsatna nasa tak a thlen mek laia chak zawka hma la tura an phut thu an sawi bawk.