Dilkawn khaw tui lakna EFCC Minister in a hawng

Jal Jeevan Misson (JJM) 2020-2021 sum cheng nuai 93.50 senga siam Dilkawn Water Supply Scheme leh cheng nuai 25.07 senga khawchhung In tina tui connection pekna, Functional Household Tap Connection (FHTC) chu nimin khan Environment Forest & Climate Change (EF&CC) Minister TJ. Lalnuntluanga chuan a hawng.

Heng Tui pekna hawn thar puala inkhawm Dilkawn Community Hall-a neih ah Minister TJ. Lalnuntluanga chuan Dilkawn khua in tuilakna tha tak a nei thar chu thinlung taka a lawmpui thu leh a tihlawhtlingtu PHE Minister, Department thawktu leh khawtlang mipuite chungah lawmthu a sawi. Forest Minister chuan tuihna humhalh leh tihpun tinzawnin kumin-ah Green Mizoram Day hman tum a nih thu pawh sawiin, tuihna humhalh a tulzia mipui zirtir nan tuilakna lui kam remchangah te Green Mizoram Day hman tuma ruahmanna siam a ni tih a sawi bawk.

Nimin-a hawn tak Dilkawn Water Supply Scheme hi Lei hipna (Gravity) hmanga tui lak niin May ni 20, 2020 khan thawh tan a ni a, December ni 13, 2021 khan thawh zawh niin tun thlengin Tui Connection pawh In 212-ah pek a ni a. A siam nan hian Sawrkar laipuiin senso za zela 90 tumin State sawrkarin za zela 10 a tum thung a, a puitlin theih nan hian khawtlang mipuiten cheng nuai 1.5 hu tha an thawh bawk a ni.

He tuilakna hmang hian mi pakhatin nikhat-ah tui litre 55 thleng hmang anga chhutin mi 1505 te kum 2050 thleng chawmzo tura duan a ni a, Tuilakna Lengkir lui atang hian chhuk zawnga tuilak niin, tuilakna thui zawng hi metre 2,300 (km 2.3) a ni a, nitin darkar 24 chhung tui haw thei tur leh tui litre 82,775 thlenga haw thei tura duan a ni. Tuilakna pipe hi 50 mm diameter GI (M) pipe niin, Horizontal Roughing Filtration (HRF) hmanga thlitfim a nih hnuah tuizem lian litre 1,00,000 dawngah chhunluh a ni a, heta tang hian 80 mm GI pipe hmanga lakchhuah leh niin, Dead End/Tree System hmangin khawchhung In tinah Tui connection (Functional Household Tap Connection) pekchhuah leh a ni.