MADC-a sawrkar thar siam tur chungchang ah Party pathum te ngaihdan a inang lo

Mara Autonomous District Council (MADC) inthlanna neih zawh a nih hnuah Indian National Congress (INC) leh MNF te tangdun chuan sawrkar an siam dawn ta niin a lang a, hemi chungchang ah hian he inthlanna a Seat la Party pathum te ngaihdan a inang lo hle.

MADC inthlanna a Seat la tam ber nia Seat 12 latu BJP-a President Vanlalhmuaka chuan Mizoram Politics-a a vawikhat nana MNF leh Congress Party an thawk dun chuan party kal dan phung mumal nei lo, Lalna leh Thuneihna chiah duh an nih zia a tilang chiang hle niin nimin-a an Party Office-a Political Session neih ah a sawi a, Mara mipuite'n MNF emaw Congress-ah emaw rinna an nghat tawh lova, mipuite duhthlanna neitu chu BJP Party a ni tih Seat lak dan atangin a chiang tawh nia sawiin, mipuite duh dan lovin Seat tlemte chauh hmu Congress Party atanga CEM dah a ni te chuan lalna chauh atchilha politics an kalpui dan a tarlang a ni, a ti.

MNF Party chuan MADC-ah MNF leh Congress tangrual sawrkar thar a piang thei tur chu lawmawm an ti takzet tih nimin khan thuchhuah siamin an tarlang a, MADC-ah hun engemaw chen sawrkarna siam thei awm lova boruak a chiri hnua MNF leh Congress tangrual sawrkar thar a piang thei tur chu lawmawm an ti takzet tih tarlangin, MADC-a sawrkar thar a pian theihna tura Party pahnih - MNF leh Congress hotute inpekna a fakawm tih an tarlang a, Sawrkar tha leh ngelnghet, Mara ram tana chenfakawm a din theih nan duhsakna an hlan tih an tarlang bawk.

MPCC President Lalsawta chuan nimin khan thuchhuah siamin he inthlanna ah Party mal Sawrkar siam thei an awm loh avangin Party indawr kualna a nasa tih an hriat thu leh Party hotute ngaihdan hriat an duh thu sawlama an hotuten an thlen avangin PAC Meeting hmanhmawh neiin BJP nen emaw, MNF nen emaw a Sawrkar intawm siam chu tha an tih loh thu an hriattir nghal thu a tarlang a. Heti chung hian Joint Congress - MNF Legislature Sawrkar an siam thu an hria tih tarlangin, “Party duhdan hre reng chunga MDCC-a kan hotute leh kan MDC ten hetianga Sawrkar an siampui lui mai hi kan Party chuan a ngai thutak hle a. Loh theih lohvin 'Show Cause Notice' kan pek a ngai dawn a. Chumi hnu-ah kan hotute'n kan kal zel dan tur chu an la ngaihtuah ang,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar