Dr. Thangtea’n MNF danglamna a sawi

South Tuipui bialtu MLA leh Dr. R. Lalthangliana chuan MNF danglamna chu sawrkar hmasa thiltih pawh kan ram tana tha tur chu a hnawl ngai lova a chhunzawm zel chu a nih thu a sawi.

Hnahthial Electric Veng Community Hall-a MNF South Tuipui Block-I Political Training nimin a neih a hmanpuina ah he thu hi sawiin Dr. R. Lalthangliana chuan kum 1998-ah an sawrkar tih sawiin, “Sawrkar hmasa Congress khan District thar 5 a puang a, a thu ringawtin an puang a. Tih puitlin harin hautak hle mahse; Pu Zoramthanga kaihruai sawrkar khan Cabinet-ah kan rel a, sawrkar hmasa puan mah nise kum 2003-a kan sawrkar tawp dawn kha chuan District 5-te chu pangngai takin kan kalpui thei a ni,” a ti a. Kum 2008-a an term tawp dawn hnai khan Hnahthial, Saitual leh Khawzawl chu District-ah an puang ve tih sawiin, “Congress sawrkar kum 10 chhung khan engtin mah an chhunzawm ve lo, kum 10 chhung meuha an tihpuitlin theih loh kha, kum 2018 November thlaah kan sawrkar leh a, kan sawrkar tirh atanga thla 8 chhung lekin keini chuan District 3 kan puan chu pangngai takin kan function tir leh hman,” tiin Chief Minister Zoramthanga chungah pawh lawmthu sawi an ba nasa hle nia a hriat thu a sawi a ni.

Health Minister ni bawk Dr. R.Lalthangliana chuan SEDP pawh Covid avangin hma an la hlei thei lo tih sawiin, “Kumin chho leh nakum chho ah hi chuan nasa taka kalpui kan tum a ni,” a ti a. Health Worker an lak theih hunah a khaw mi ngei duhsak nise tih pawh sawiin, “A khaw mi tak lak tur an awm loh pawhin a khaw hnaivai a mi ngei lak tha kan ti a, a chhan chu transfer dil zung zung lova, mahni thawhna hmuna awm nghet tur hi kan duh a ni,” a ti bawk.