Burma atanga dan lova Kuhva tawlh chungchang ah Central YMA chu a dinna ngaiah a la ding

Central YMA President R. Lalngheta chuan Burma atanga dan lova lo kal Kuhva rah ro tawlhluh leh Mizoram a awmsa lakchhuah chungchang ah Central YMA chu a dinna ngai ah a la ding reng tih a sawi.

Bairabi-a Zampuimanga Group YMA in an man Burma Kuhva rah ro dan lova tawlhruk dahkhawmna Kudam chu Inrinni khan Central YMA hruaitute hian an President R. Lalngheta hova tlawhin Zampuimanga Group YMA hruaitute nen inkawmna an nei zui a, he hunah hian Central YMA President chuan Zampuimanga Group YMA in dan lova Kuhva rah ro tawlhruk dahkhawm thahnem tak an lo man chu Central YMA thuchhuak bawhzuina a nih thu leh lawmawm an tih thu a sawi a. Burma atanga dan lova lo kal Kuhva rah ro tawlhluh leh Mizoram a awmsa lakchhuah chungchang ah Central YMA chu a dinna ngai ah a la ding reng tih sawiin, “Central YMA in a tih dan tur a relfel hma chu Burma Kuhva rah ro hi tuman a rukin emaw, kan thiam dan anga lo tawlh lo turin kan in ngen nawn leh a ni,” a ti a. Burma atanga Kuhva rah ro tawlh chungchang hi Central YMA chuan a zirchiangtu tur Study Tam a siam tawh tih pawh sawiin, Central YMA Study Team te hian Mizoram hmun hrang hranga Kuhva rah ro dahkhawmna Kudam an tlawhkual tawh a, mi chi hrang hrang an kawm tawh bawk a. Central YMA Study Team te leh Office Bearer (OB) ten sawiho lehin, Central Executive Committee (CEC) Meeting-ah sawiho a ni leh dawn a, CEC Meeting thutlukna angin kalpui a ni dawn tih a sawi a ni.

Bairabi North-a Bamboo Industry Kudam-ah Burma Kuhva rah ro dahkhawm thahnem tak a awm thu Zampuimanga Group YMA te hian dawngin Feb. 23, 2022 khan Police te nen enfiah nghal a ni a, Zampuimanga Group YMA hruaitute chuan a enkawltute hnenah chuan Bairabi a thlen theihna tura document hrang hrang permit an neih te pe tura ngenin, an pek theih loh avangin April 13, 2022 khan Sub Deputy Commissioner, Bairabi Sub-Division ah First Information Report (FIR) an thehlut zui ta a ni.

Central YMA hruaitute leh Zampuimanga Group YMA hruaitute inkawmna hi Group YMA Vice President H. Vanlalhruaia chuan kaihruaiin Bairabi North-a Bamboo Industry Kudam-a Burma Kuhva rah ro dahkhawmna hmun hi a huho in an tlawh nghal a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar