Sports discipline chawisan a, eizawnna tlak a siam sawrkar in a ngai pawimawh - Chief Minister

Chief Minister Zoramthanga chuan sawrkarin Sports chu Industry-ah a lo pawm tawh angin Sports Discipline hrang hrang chawisan a, eizawnna tlak a siam chu sawrkarin a ngaihpawimawh thu a sawi.

Inrinni kalta a BYJU's Mapuia Memorial Mizoram Cricket League hmawr bawkna, Suaka Cricket Ground a neih a hmanpuina ah he thu hi sawiin Chief Minister chuan sawrkar in Sports Discipline hrang hrang chawisan a, eizawnna tlak a siam a tumna kawngah Cricket chu lungthu pawimawh tak a nih zia sawiin, thalaite tan eizawnna tling tak a nih theih thu te a sawi a, GST-ah pawh mipui hman turin Chhiah tam tak Cricket atang hian sum chhunluh a nih thu a sawi a ni. Chief Minister chuan Mizoram-ah Cricket in hma a sawn zel theih nan khelmual neih belh chungchangah te, tuna Ground neih mek tihchangtlun ngai an thlente chu sawrkarin a theih angin a lo ngaihtuahzui sak zel tur thu a sawi bawk.

BYJU's Mapuia Memorial Mizoram Cricket League hi April 21, 2022 atang khan khelh niin club paruk (6) an tel a, Final-ah hian Chanmarians Cricket Club leh Chhinga Veng Cricket Club te intumin Chhinga Veng Cricket Club in hnehna an chang a. Champion club hian Trophy bakah pawisafai cheng nuai hnih an dawng a, pahnihna in Trophy leh Rs. 1,50,000.- an dawng bawk.