Malaria vei leh thupui tam State zingah kan la tel avangin tan lak nasat a ngai - Health Minister

Health Minister Dr. R. Lalthangliana chuan Mizoram chu India ramah Malaria vei leh thihpui tam State zingah a la tel avangin tan lak nasat a la ngai a ni, a ti a. Mizoram chu kum 2030-ah Malaria natna awm tawh lohna ram a siam tumin Mizoram sawrkar in theihtawpin hma a lak thu a sawi bawk.

National Centre for Vector Borne Disease Control (NCVBDC) buatsaiha World Malaria Day puala inkhawm Inrinni zing a Directorate of Health Services Conference Hall, Aizawl-a neih a hmanpuina ah he thu hi sawiin Health Minister Dr. R. Lalthangliana chuan Malaria dona kawngah sawrkarin theihtawp chhuaha hma a lak rualin mipuite pawhin tih tur an nei ve tih a sawi a. Malaria natna hluar hun Fur a lo thleng chho tan dawn a, a bikin Malaria vei tamna hmun Mizoram khawthlang lam, Bangladesh leh Tripura hnaih lamah uar lehzuala mipuite zirtir a ngai tih a sawi a. Mahni In theuh Thosi hlo kah hun laia lo kah tir te, damdawi-a Thosilên chiah te, Thosilên damdawi a chiah sa dawn te tha taka zar zui te chu mipui tih ve theih a ni a, heng bakah hian mahni In leh a chhehvela Thosi pian theihna awm reng reng tui tling leh a dangte tih bo leh khawsik apianga rang taka thisen endiktir leh damdawi tha taka ei te chu Malaria natna do hneh theihna tura mitin mawhphurhna a ni tih mipuiten hre tharin, he natna hi do hlawhtlin anih theihna tur chuan sawrkar hmalakna hrang hrangte hi mipuiten tha taka an thlawp a ngai a ni, a ti bawk.

Health Minister chuan India sawrkarin kum 2030-ah chuan India ram hi Malaria natna awm tawh lohna ram-ah siam tumin hma a la tih sawiin, chumi rual chuan Mizoram sawrkar pawhin theihtawpin hma a la mek a ni, a ti a. Malaria natna tirem tur hian Health Department-a thawkte inpekna chauh a tawk lova, sawrkar department hrang hrangte, Mizoram mipui leh chhungkaw tinte bakah Kohhran leh Pawl hrang hrang te an tan tlan a ngai vek a ni, tiin theihtawp chhuaha thawhpuiah a sawm a ni.

He huna tarlan a nih danin nikum khan Mizoram-ah Sikserh natna vei mi 5,637 an awm a, mi 10-in an thihpui a; nunna chante hi June atanga September thla inkara thi an ni. Kumin (2022)-ah January leh February thla khan Malaria natna vei mi 354 an awm tawh a, Mamit, Lunglei leh Lawngtlai District te chu Malaria hluarna an ni.

World Malaria Day hi World Health Organization (WHO) bultumin kumtin April ni 25-ah hman thin a ni a, kumin hian ‘Ruahmanna thar nena Khawvel puma Malaria natna avanga harsatna leh thihna tihhniam’ tih chu thupui-ah hman a ni.