African Swine Fever (ASF) avangin Champhai leh Mamit District-ah Vawk thi a awm belh zel

Kumin March thla atanga Vawk pul hri, African Swine Fever (ASF) leng nawn leh avangin Mizoram-ah Vawk thi a pung zel a, Champhai District lamah khaw 20 luhchilh mekin Vawk sang chuang a thi tawh a, Mamit District-ah pawh Vawk sang hnih chuang a thi tawh bawk.

ASF avang hian nikum lam khan Champhai District-ah Vawk 500 chuang thi awmin kumin-a he hri leng thar leh hian khaw 20 vel tuam mekin Vawk sang chuang a thi tawh a, Champhai District AH&Vety Officer Dr. B. Lallawmsanga sawi danin AH & Vety Department Director, Dr. Lalremliana leh Vety Doctor pathum te chu niminpiah khan Aizawl atanga Champhai District a Vawk pul hri dinhmun leh Zokhawthar-a AH&Vety Department hmun turte enfiah turin Champhai District-ah a kal a, nimin khan Champhai District-a Vawk pul hri avanga Vawk thih nasatna ber Fawrkawn khua an tlawh leh bawk a, he khuaa Village Council hruaitute, Tlawmngai Pawl hrang hrang hruaitute leh Vawk vulhtute hmuin thil kalphung an sawipui a ni.

Report a tarlan a nih dan chuan niminpiah thleng khan Champhai District-ah ASF vang hian Vawk 1088 an thi tawh a, nimin lamah Vawk 53 thi belh lehin nimin chawhnu thleng khan Champhai District-ah Vawk 1141 a thi tawh a, Vawk 757 chu invenna atan tihhlum a ni bawk. Farkawn khuaah hian niminpiah thleng khan Vawk 303 a thi tawh a, Vawk 260 suat a ni bawk.

Mamit District-ah pawh Vawk hri leng hian ziaawm lam a la pan thei loh avangin hmun hrang hrangah Vawk thi a pung zel a, tun thla tir atang khan Mamit khawpui chhung New Mamit leh Chhim Veng VC Area-ah Vawk thi awm belh lehin tunah hian Vawk 40 vel a thi tawh a, heng vawk thi zinga a zatve vel chu Vawk puitling, talh rual leh Vawk laihawl te an ni a, nimin pawh khan heng VC huamchhungah te hian Vawk thi a awm belh leh bawk a ni.

Hetianga Mamit khawpui chhunga Vawk vulh te a thih avang hian Mamit Bawrhsap Lalnunhlua hova ruahmanna siam angin Vawk thite hi Mamit thlen hma Luangpawl VC Area Forest Reserve, Zo Ngaw-ah phum thin a ni a, Vawk phum leh zelna tur pawh niminpiah khan Mamit DVO hovin Forest Reserved chhungah hian enfiah leh a ni bawk. Mamit-a AH&Vety Department chhinchhiah danin ASF avangin Mamit DVO huamchhungah Vawk 2660 a thih tawh bakah ASF vei Vawk 304 te chu tihhlum a ni tawh bawk a ni.