ZPM Chhung Inkhawm-ah an President in thu sawi

ZPM chuan nimin khan Aizawl-a an Office-ah chhung Inkhawm neiin an President Lalliansawta chuan thu a sawi a ni.

ZPM Chhung Inkhawm ah hian ZPM President chuan mi thinlungah ZPM-in hna a thawh nasat thu sawiin, “Zoram hmun hrangah kan fehchhuak a, a thlawnin tumah kan haw lo. Hmun tinah lawmluh tur an awm a, kan thawhrimna a thlawn lo. Pawl boruak a tha a, thahnemngai taka thawktute chungah lawmthu ka sawi a ni,” a ti a. Kan hma lawkah Lunglei Municipal Council (LMC) leh Mara Autonomous District Council (MADC) inthlan kan hmachhawn dawn tih pawh sawiin, hemi atan hian General Headquarters-in nasa takin ngaihtuahna a sen thu leh chakna chang ngei turin hma an lak thu a sawi a, “Heng inthlan chungchang buaipui tur Cmmittee hi din a ni tawh a, kan candidate tur te reng reng hi Headquarters-in a ruat tur leh thutlukna a siam tur a ni. Kum 2023 MLA General Election lo awm turah pawh Headquarters-in candidate tur mi tha tak tak a ruat dawn a, Party mi te chiai lo tur leh thu lengvak mai mai buaipui lo turin ka duh che u a ni,” a ti bawk.