Serlui chhehvel ramngaw humhalh a tul - E&F Minister

Environment, Forest & Climate Change Department changtu Minister TJ. Lalnuntluanga chuan Serlui tuikhuah chhehvel a ramngaw tih chereu zel a ni chu humhalh vat a tul thu a sawi.

Kolasib District chhunga Green India Mission, Nagar Van Scheme leh Compensatory Afforestation Fund Management and Planning Authority (CAMPA) hnuaia hmalakna hrang hrang kalpui dan tur nimin-a a hmuna a enfiahna ah Forest Minister hian Serlui B Hydel Project-a tuikhuah hi a tlawh a, Serlui tuikhuah chhehvel a ramngaw tih chereu zel a ni chu humhalh vat a tul thu sawiin, a kam atanga lei tawlh avangin Serlui Hydel Project chu hman tlak loh a a awm mai a hlauhthawnawm thu a sawi a. Neitu nihna thinglungpu chunga Serlui tuikhuah kam ramngaw chereu mek ven hna chu Sawrkar emaw, Department bil tih tur a dah mai loa, mitin mawhphurna a nih thu Minister chuan sawiin, tuihna humhalh leh lei tham bettu, thing phun uar zel turin mipuite a ngen bawk a ni.

Forest Minister hian Green India Mission, Nagar Van Scheme leh Compensatory Afforestation Fund Management and Planning Authority (CAMPA) hnuaia hmalakna tur Kawnpui, Bilkhawthlir Joint YMA Park, Serlui tuikhuah leh Aitlang luite a tlawh a. Saiphai leh Vairengte inkar a dan lova thing leh mau tawlhruk a awm loh nan Check gate ruahman dan turte, Aitlang lui, Vairengte kam humhalh tur a hmalak dan turte Forest Department thawktute nen an en ho a, Botanical Garden sakna tur hmunhma pawh an endik nghal bawk a ni.