Zophai-a Lei dawh chhunzawm turin sawrkar ngen

Mizo Zirlai Pawl (MZP) General Hqrs. chuan Bairabi Zophai a Mizoram sawrkarin Lei a dawh mek, hun rei tak chawlhsan tawh chu chhunzawm ve nghal turin thuneitute an ngen.

MZP General Hqrs. hruaitute hian niminpiah khan an President Lalnunmawia Pautu hovin Phainuam Buarchep ram-a Assam Lei dawh leh Bairabi Zophai hmuna Mizoram Lei dawh mek chu a hmunah enfiahin an tlawh a, State pahnihte inremna Status Quo tha taka Mizoram Sawrkarin a zawm lai leh Bairabi Zophai a Lei dawh mek pawh laklawh taka chawlhsan a nih mek laiin, Assam lamin Phainuam Buarchep-a Status Quo chhung Assam Police te duty-na piah lamah thir leihlawn tha tak mai hun reilote chhunga a dawh chu hriatthiam har an tih thu sawiin, “Kutthlak lo tura State pahnihte inremna (Status Quo) zah loah Assam sawrkar kan ngai a kan dem takzet a ni,” an ti a. Mizoram in hmathar a lak apianga Assam lamin an rawn ngaihmawh em em laia, Assam lamin Status Quo chhungah hma thar a la thin chu tha an tih loh thu sawiin, Assam lamin hetiang hmalakna a kalpui fo avangin Bairabi Zophai-a Mizoram sawrkarin Lei a dawh mek, hun rei tak chawlhsan tawh chu chhunzawm ve nghal turin thuneitute an ngen tih an sawi a. Kan ram kan chan zel loh nana kan ramri uluk taka vil turin leh Assam chet dan uluk taka thlithlai reng turin thuneitute an ngen bawk.

MZP General Hqrs. hruaitute leh Kolasib leh Vairengte-a MZP hruaitute chuan nimin khan Chief Minister Zoramthanga chu hmuin an duhdan hrang hrang leh ramri humhalh tura hmala turin an ngen a. Chief Minister chuan a tul anga an rawtna hrang hrangte lo bawhzui a, lo enzui a tum thu a sawi tih MZP chuan sawiin, lawmawm an tih thu an sawi bawk.