Vaimim chi pek kuthnathawktute hmuhsitna niin ngai

Congress Legislature Party Leader (CLP) leh MPCC Treasurer Zodintluanga Ralte chuan SEDP Vaimim chi in pek chu kuthnathawktute hmuhsitna nia sawiin, “Chhuanmang rorel a ni ber mai,” a ti.

Nimin-a a bial chhung Bunghmun-a party inhmuhkhawmna neih ah Zodintluanga chuan MNF Party chuan mipuite hmangaihna an nei lo nia sawiin, “Tuna SEDP Vaimim chi an pek hi kuthnathawktute hmuhsitna a ni. Hetiang hi chhuanmang rorel a ni ber mai. Lo in hal vek tawhah Vaimim chi bag khat tuh zawhna a awm lovang. Kar leh lawkah Bekang chi a lo thleng leh anga engtin nge in tih ang?” tiin Vaimim chi SEDP atana an sem chu kuthnathawktute tan harsatna thlentu mai a nih tur thu a sawi a. Vaimim chi dawngtute zingah Lo nei miah lo te pawh an awm thu a sawi a. MNF sawrkarah mipuite khaichhuahna tur a awm loh zia sawiin Zodintluanga chuan, “He sawrkar hian kan sum dinhmun an tichhe vek tawh a, Contractor leh Supplier tan cheng vaibelchhe za tel a tang tawh a ni,” a ti bawk.