ZOHANDCO buatsaih Craft Bazaar neih a ni

Zonuna Kawlni (LENKAWL) • April 7, 2022 • Comments • Mizoram

Mizoram Handloom & Handicraft Development Corporation Ltd. (ZOHANDCO) buatsaih tun thla ni 8 thleng awh tur ‘Craft Bazaar’ chu I&PR Minister Lalruatkima chuan nimin khan Aizawl Vanapa Hall-ah a hawng.

Ministry of Textile hnuaia Development Commissioner (Handicraft) bultuma buatsaih Craft Bazaar hawnna ah hian I&PR Minister chuan kan hnam incheina leh pi leh pute atanga kan themthiamna thil te chu hnamdang laka kan nihna tichiangtu, thil hlu tak leh vawn nun reng chi a ni tih sawiin, chumi kawngah chuan ZOHANDCO in mawhphurhna a neih thu leh hei vang hian Coporation thiah tak zingah an tel lo tih a sawi a. Tunah phei chuan Corporation pawimawh tak leh hmasawn zawnga hmalam pan mek an ni tih sawiin, ZOHANDCO in hma a sawn zel chu thil lawmawm tak a nih thu a sawi bawk.

Mizo la deh atanga tah chhuah – pawnchei leh incheina chi hrang hrangte leh thiamhnang atanga Mizo ten themthiam taka an siam thil chi hrang hrangte Mizoram pawnah pawh hriat a hlawh tawh hle tih I&PR Minister chuan sawiin, “A siam mawi, a siam tlo leh a siam that kawngah hmasawn erawh a la ngai a; a hralhchhuah kawngah pawh mumal zawka branding nei thlap a kalpui pawh a tul tawh hle a ni,” a ti bawk.

Craft Bazaar hi April 8, 2022 thleng Vanapa Hall-ah neih a ni dawn a, Mizopa kutchhuak – thing leh thiamhnang atanga siam te, tlereuh te, thawmhnaw lam chi te lei theih tura phochhuah a ni.