Ruihhlo ngai 2600 chuang awm

YMA Kumpuan “Ram leh Hnam humhalh’ tih hnuaia hmalakna pakhat atan niminpiah khan ruihhlo do chungchangah inrawnkhawmna neih a ni a, hetah hian Mizoram-ah ruihhlo ngai mi 2600 chuang hret an awm thu leh ruihhlo zuar mi 340 vel an awm thu tarlan a ni.

He inrawnkhawmna hi Central YMA President R. Lalngheta chuan kaihruaiin MJA Office Bearer te, MKHC, MHIP, MUP, MSU, Mizoram Bar Association, Police, Excise & Narcotics leh Judicial Magistrate aiawhte an tel a. Ruihhlo chungchanga thawhhona tha a awm theihna atana hmalak dan tur te, ruihhlo laka thalaite ven dan turte leh thil pawimawh dangte sawiho a ni.

Sawihonaa tarlan a nih danin, Mizoram a ruihhlo ngaite ruihhlo tih tam ber chu Heroin a ni a. Ruihhlo zuar mi 340 vel awmin, chungte chu ruihhlo ti ve thin tho te, ruihhlo ti lo a hlawkna duha zuar hrim hrim te an ni a, Aizawl leh a bulhnai Phunchawng, Rangvamual, Tuikhurhlu leh a chhehvela zu zuar mi 343 an awm bawk a. Mizoram, a bikin Aizawl-ah ruihhlo ti nasa taka an pun leh tawh avangin fimkhur zawka YMA in ruihhlo a do leh tak tak a ngai tawh nia an hriat thu te tarlan a ni bawk.

Ruihhlo do tur leh ruihhlo la ti ve lote ruihhlo laka venghim turin sawrkar, Kohhran, tlawmngai pawl hrang hrang leh Media te an thawhho that a tul thu te, Kohhran inkhawmah ruihhlo thatlohzia inzirtir a tul thu te, zirna In a bikin Higher Secondary leh a chunglam ah inzirtir tam a tul thu te, inzirtirna atan Mainstream Media leh Social Media te tangkai lehzuala hman tur thu te sawi a ni.

Heng bakah hian Sawrkarin tih tak taka ruihhlo a do a tul thu te, ruihhlo dona lama thawktu Excise and Narcotics leh Police te thuam chak a tul thu leh a bikin Excise and Narcotics Department tihlen a, sum leh pai-ah vulh nasat a tul thu te tarlan a ni bawk.