Hri leng ralpui phiar-a phiar tum tawh lo

India rampumah COVID-19 hri a tlakhniam zel avangin Ministry of Home Affairs chuan ralpui phiarin a phiar tawh dawn lo a. Disaster Management Act hmanga kaihhruaina leh inkhuahkhirhna a lo siam thinte pawh ti tawh loin Ministry of Health and Family Welfare kutah a dah tawh dawn.

Ministry of Home Affairs Secretary Ajay Bhalla chuan India ram State leh UT Chief Secretary-te hnenah lehkha thawnin, Disaster Management Act hmanga khuahkhirhna chi hrang hrang a lo tihchhuah tawhte hman chhunzawm leh chhunzawm loh chu State leh UT te thu-a dah a nih thu a sawi a. Covid do chungchangah hian Ministry of Home Affairs chuan thuchhuah thar a nei dawn lo tih sawiin, Ministry of Home Affairs atangin kaihhruaina leh khuahkhirhna thar awm tawh dawn lo mah se Ministry of Health and Family Welfare-in kaihhruaina a siam he'ng- hmui tuam, kut vawn thianghlim leh adangte erawh chu a la awm reng tho dawn tih lehkha ah hian tarlan a ni a, hri leng chungchangah hian State leh UT te chu inthlahdah chuang lo turin a ti a. Hri hi a lo hluar leh a nih pawhin Ministry of Health and Family-in kaihhruaina tihchhuah hrang hrangte hmanga a tul ang a hma lo la ve mai turin a ti bawk.