ZLP ten Airport cheithat hna thawh mek an tlawh

ZPM Legislature Party (ZLP) chuan nimin khan Lengpui Airport chei that mek a hmunah an tlawh.

Lengpui Airport chei that mek hi March ni 10, 2022 khan chimin, a chim bak zawng hi thuneituten thiat tura an tih anga thiah nia hriat a ni tih ZPM chuan sawiin, hetiang hi a nih avangin hnathawh dan chungchang enthlithlai turin nimin khan ZPM Legislature Party te hi an kal ta tih an sawi a. He hunah hian ZLP Leader Lalduhoma chuan sum tam tak senga Airport cheithat hnathawh hetianga a chhe ta mai hi a pawi hle tih sawiin, “A hmuna enchian hian hna kalphung hrim hrim hi a chhia tih a hriat a ni. Hnathawhna cement char tawh te pawh hi kut lawng-a hmeh pawhin a sawm mai mai thei a ni. Chutiang khawpa chhia chuan hna an thawk a, a chim chu thuhran nise, a chim bak pawhtthiah leh ngai khawpin a lo awm phah ta a ni,”a ti.

ZLP Leader chuan, “Airport chim rual khan thuneituten a chim chhan an chhui ang a, hrem ngai an hrem dawn emaw mipuiin an tih laiin, kan thu hriat chu chhui a nih loh tur thu a ni. Kan ramah hian hmasawnna hnathawh a chhe em em thin a, ZPM kan sawrkar hunah chuan contract hi a hun lova zawh a awm dawn lova. Hnathawk tha lo leh a hun a zo lo chu kan hrem nghal zel dawn a ni,”a ti bawk a. Airport cheithat hna thawktu KR Construction hian hmun hrang hrangah hna an thawk nia sawiin, “An hnathawh zawng zawng hi endik a nih loh chuan vanduaina rapthlak zawk kan la tawng thei ang tih kan rin avangin a hna dang pawh hi endik vek kan duh a ni,” an ti bawk.