Kolasib DC in ramri-a hmalakna hrang hrang a tlawh

Kolasib District Bawrhsap John LT Sanga chuan nimin khan Vairengte khaw chhehvel a hmalakna hrang hrang endikin, Aitlang leh Sabual mual-a Mizoram Police duty-na hmunte tlawhin a tul a hman tur pawisafai leh silpaulin engemaw zat a hlan.

SDO (C) Conference Hall, Vairengte-ah John LT. Sanga hi Vairengte khawtlang hruaitute nen inkawmna neiin District Bawrhsap mawhphurna tha taka hlenchhuah a nih theih nan thawhhona tha a pawimawh thu sawiin, chumi tur chuan inhmelhriatna leh inpawhna tha neih a tul thu a sawi a. Hrileng kar a ram pumin buaina a hmachhawn lai a kan ram luhkapui ber awmna Vairengte khaw mipuiten kawng hrang hranga an mawhphurnate an hlenchhuak thin chu fakawm a tih thu sawiin, ramri-a buaina chungchangah pawh midangte entawntlak khawp a ram leh hnam tan a huaisenna leh tlawmngaihna an lantir thin chu ropui a tih thu a sawi bawk.

Kolasib DC chuan ramri veng a duty Mizoram Police-te a tlawhna ah hian an inpekna leh an huaisenna fakawm a tih thu sawiin, ram tan a fehchhuak an nih anga an hna rinawm tak a hlenchhuak zel turin a fuih bawk.