Chief Minister in hmanpui
Mizoram Rahbi: Micro Startup Capital Competition 4.0 a tithate hnena lawmman hlanna chu nimin khan Dawrpui Multipurpose Hall-ah neih niin Chief Minister Zoramthanga chuan a hmanpui a ni.
Planning & Programme Implementation Department hnuai a Entrepreneurship Development Centre-in Mizoram State Entrepreneurship Development Monitoring Committee (MEDMOC) hmalaknaa kalpui Mizoram Rahbi: Micro Startup Capital Competition 4.0 lawmman hlanna ah hian Chief Minister chuan Mizoram Rahbi intihsiakna thil tum chu tha a tih thu sawiin, thil tangkai tak tak leh tha tak tak ngaihtuah chhuah hi a bul tanna lian lo te a nih fo thin thu leh thil tereuh te a kan ngaihte hi hlawhtlinna tlanga mi hruaitu a nih thin thu a sawi a. Thil siamchhuah tha tak tak te, thenkhat State pawn atanga chawk-luh ngei ngei thin mahni ramchhung ngeia siam-chhuah tak te hmuh tur a awm chu lawmawm a tih thu sawiin, Mizoram-ah hian chutiang zawnga ngaihven a la hmuhchhuah leh hriatchhuah tur tam tak kan neih thu a sawi bawk.He hunah hian Chief Secretary Dr. Renu Sharma, MEDMOC Chairperson ni bawk chuan Mizoram Rahbi intihsiakna tum li na ah a tui mi tak tak, kum upa lam leh naupang lam tel hmuh tur an awm leh lawmman dawng tura thlan zinga hmeichhia 3 an awm chu lawmawm a tih thu a sawi a, lawmman dawngtute hi sawrkar chuan thlahthlam dawn loh thu a sawi bawk a ni.
Mizoram Rahbi: Micro Startup Capital Competition 4.0-ah hian mi 71 telin an zing atang hian a titha mi 13 thlanchhuah an ni leh a, an Project a zirin Rs. 7,50,000/- thleng an sum-dawnna bultanna (Startup) atan pek an ni ang. He inelna a tel zawng zawngte hi ni hnih chhung Entrepreneurship training pek an nih bakah finalist te chu ni hnih chhung Bootcamp neihpui an ni bawk.
Comments
Post a Comment