Tuikhuah kam-a lo leh huan vat te chhuahtir tum

Serlui B Hydel Project Tuikhuah kam-a Lo leh huan atana ram vattute chu chhuahtir an ni dawn.

Serlui B Hydel Project tuikhuah kam leh a chhehvelah hian kum engemawzat kalta atang khan mi thenkhat chuan ramngaw tha tak takte vatin Lo leh huan atan an nei zui a. Hei hian Serlui B Hydel Poject tuikhuah tan harsatna nasa tak a thlen a, heng mite hi Forest Department a thawktute chuan ti tawh lo turin an lo hriattir thin a, heti chung hian kumin ah tuikhuah kam vela ramngaw te chu mi thenkhatin Lo leh huan atan vatin an hal leh tawh a ni. Forest Department-in hmala tawh lo tura vawi tam tak a hriattir hnu pawha thupek pawisa lo mi thahnem tak an la awm avangin Serlui B Hydel Project tuikhuah kama ram vattute chu Kolasib District Honorary Wildlife Warden Christopher JZ. Lowlor hovin Forest Department Officer te leh thawktu dangte chuan tunhnai khan an Lo leh huan ah kal chilhin an hmalakna tawpsan tura hriattirna lehkha an pe a ni.

Kolasib DFO Margaret Lalramchhani chuan Serlui B Hydel Project tuikhuah kam leh a chhehvel ram ti chereutute lakah hian zahngai takin hma an la thin tih a sawi a, an hmalakna tawpsan tura an hriattir hnuah pawh an hmalakna titawp duh lo a, hma la lui an awm a nih chuan, an chungah Dan kenkawh an tum tawh thu leh a tul dan a zirin Dan kengkawhtu Police Force pawh an hman mai tur thu a sawi a. Heng hmunah hian thingtiak phuna enkawl zui an tum thu a sawi bawk.