Chief Secretary in sawrkar hnathawk te an hna theuh ah theihtawp chhuah zel turin a hrilh
Serchhip District tlawha rawn zin Chief Secretary Renu Sharma chuan Serchhip District in hmasawnna duhawm tak tak a neihte chu lawmawm a tih thu sawiin, Sawrkar Officer te chu an hna theuh ah theihtawp chhuah zel turin a hrilh.
Zan khat riaka Serchhip District rawn tlawhtu Mizoram Chief Secretary Renu Sharma hian Inrinni khan Serchhip DC Conference Hall ah Serchhip-a Head of Offices te kawmin Officer kalkhawmte chu an hmalakna hrang hrangte zawtin harsatna an neihte chu DC hrilh hriaa, DC kaltlanga a tul ang zela inhriattir tawna, a umzui pui thin tur thu a hrilh a, Serchhip District in hmasawnna duhawm tak tak a neihte chu lawmawm a tih thu sawiin, Sawrkar Officer te chu an hna theuh ah theihtawp chhuah zel turin a hrilh a ni. Chief Secretary chuan Fur a lo hnai leh tawh tih sawiin, Fur lo thlen hmaa inbuatsaih lawk ngaihna chi ah te pawh inpuahchah tha turin a chah a. COVID-19 hripuiin min la kiansan lo tih hriaa, COVID-19 laka himna dan (CAB) te tha taka zawm thin tur leh mipuite kawhhmuhtu ni tura entawn tlaka awm turin Officer te chu a chah a, zirna In te pawh kal tan leh tur anih avangin zirna In te pawh tha taka CAB lo zawm turin a chah bawk a ni.
Serchhip Addl. DC Lalmuansanga Ralte kaihhruai he hunah hian Serchhip District Bawrhsap Nazuk Kumar IAS chuan Serchhip District dinhmun tlangpui leh District chhunga sawrkar hmalakna langsar zualte report a pe a, Serchhip District SP Stephen Lalrinawma leh Officer dangte an kal tha hle a ni.
Chief Secretary hian tunhnaia NAAC Accreditation Grade A hmu thar Govt. Serchhip College pawh tlawhin an hmunhma te fangin Principal Lalremsiama leh thawktu dangte nen inkawmhona hun an hmang a. Serchhip District Hospital pawh tlawhin, PSA Oxygen Plant leh Hospital hmunhma te a tlawh kual a. PGCIL CSR hmanga Serchhip District Hospital thar sak tura ruahmanna awm mek chu chak taka bawhzuia, a hma thei ang bera a sak hna tan an tum tur thu thawktute hi a hrilh a ni.
Hei bakah hian Chief Secretary hian District Agriculture Office tlawhin, Composite Mini Feed Mill te, Mini Oil Expeller te, Mini Dal Mill te a tlawh bakah DAO Committee Room ah thawktute nena inkawmhona tawi an nei a, he hunah hian Serchhip DAO Tlangtimawia Zote chuan an Department hmalakna hrang hrangte a lo hrilh a ni. Hemi hnu chawhnu lamah Chief Secretary hian Serchhip chhuahsanin Aizawl lam a pan leh nghal a ni.