Thalaite hmasawnna atan infiamna ruhrel siam kawngah nasa takin hma a la - R. Lalzirliana

District Council & Minority Affairs Minister R. Lalzirliana chuan Mizoram sawrkarin thalaite hmasawnna atan infiamna ruhrel siam kawngah nasa takin hma a la tih sawiin, Mizoram hmun kilkhawr leh hnam hnufual zawkte chenna hmunah Phullem phah an tum thu a sawi.

Mizoram Football Association (MFA) buatsaih MFA Cup vawi 20-na Final Match nimin-a Keifang Centenary Football Ground-a khelh a hmanpuina ah he thu hi sawiin District Council & Minority Affairs Minister R. Lalzirliana chuan khawpui a chengte leh thingtlang-a cheng ten hmasawnna an tem rual theihnan theihtawp an chhuah tih a sawi a, District Council & Minority Affairs pawhin ram chhung hmun kilkhawr leh hnufual deuh khaw hrang hrangah infiamna ruhrel, khawpui lian zawka cheng ten an neih ang hi a theih chin chinah chhawp chhuah sak tumin tan an la tih sawiin, “COVID-19 hripui leng vangin ruahmanna awmsa ah pawh hma kan la thei lova, kan dinhmun a ziaawm takah hian kan che tan thei tawh turah kan in ngai a, tuna kan project neih sa bakah hian engemawzat neih belh kan inbeisei bawk a ni,” tiin Mizoram hmun kiltin atangin infiammi tha ber ber lo chhuak se tih hi kan duhthusam a ni tih a sawi a ni.