I&PR Minister in MJA hruaitu thar te a kawm

I&PR Minister Lalruatkima chuan nimin khan a Pisa-ah MJA General Hqrs. hruaitu thar te kawmin Journalist-te leh I&PR Department kaihhnawih thil chi hrang hrang an sawiho.

He inkawmna ah hian I&PR Minister chuan MJA Golden Jubilee lawmna leh General Conference tluang taka neih a ni chu lawmawm a tih thu sawiin, “Hruaitu thar te kan nei a, duhsakna kan hlan che u. Thuràwn inpe tawnin i infinchhuah zel ang u,” a ti. Lalruatkima chuan, Press Enclave an la bawhzui zel rualin, hmalakna a chak thei lo tih a sawi a; Journalist Pension Scheme a kal chho zel tih pawh sawiin, “A la kal zel ang a, file a la kal mek. Tih hlawhtlin hun kan nghakhlel a, a tul ang zelin hmalak kan tum,” a ti a. MJA member-te tan Press Tour leh Parliament Training buatsaih chungchang leh Advertisement rate chungchangte a sawi lang bawk.

He hunah hian MJA General Hqrs. President C. Lalrambuatsaiha pawhin Press mite leh I&PR Department thawhhona a tha tih a sawi a, “Hetianga thawhhona tha hi state dangah a awm kher lo mai thei. MJA-te kawng tinréngah min duhsak thin a, kan lawm hle a ni,” tiin Advertisement, Press Tour leh Journalist Welfare Fund chungchangte a sawi lang bawk a ni. He inkawmna ah hian I&PR Secretary Hualsangi, Addl. Secretary Betsy Zothanpari, Director C Lalnunkima leh Joint Director pahnih -Lalfakzuala leh PB. Lianthangpuii te pawh an tel a ni.