MNF President in Politics-a inbeih dan hniam tiin nakum inthlan ah Seat 30 an lak tlin a ring
MNF President Zoramthanga chuan Politics-a kan inbeih dan a hniam tih sawiin, nakum a MLA inthlanah Congress chu Under 5, ZPM Under 10 leh MNF chu MLA 30 tlin tura a rin thu a sawi a, “Congress phei chu beih beih tham an ni lo,” a ti.
Nimin-a Aizawl Mizo Hnam Run-a MNF Chhung Inkhawm neih ah an President Zoramthanga chuan Politics-a kan inbeih dan a hniam tih sawiin, “Kan hnathawh dan leh development kalpui danah Zoram mipui tan a tha em? tih lam aiin an hunlaia Tribal Certificate an pek Kamrula-te an buaipui em em a. Abu-a pawh buhfai supply tura an hman kha, keini'n ramri buai lai khan i supply chhunzawm thei ang em tia kan chhawr zui mai a ni,” a ti a. Eptu ten sawi pawr tur an dap nasa nia sawiin, “SEDP sem turte an hmu a, an mang a ang em em a. Heti lai BJP-ten President's Rule-a Mizoram dah tura an nawr laiin Rajya Sabha Chairman berin Mizoram Assembly House-ah kan rorelna chu India rama tha ber pawl a nih thu a sawi chhuak tih a sawi a, Party mipuite chu hlauthawng lo tur leh dinghet tlat turin a chah a ni.MNF President chuan ‘MNF chu hun tha lo atan ruat a ni’ tiin an khingpui ten an sawi thin tih pawh sawiin, hei hi a dik rualin hun tha atan pawh ruat an ni tih a sawi a, MNF-in mautam tam a hmachhawn thu leh tun tumah Covid-19 a hmachhawn thu sawiin, “Pathian tanpuina in kan su chho zel a. Amaherawhchu, MNF chuan hei aia rapthlak kan su tam tawh lutuk, tam tak kan thi tawh bawk. Tuna harsatna hi chu kan sut tlang tawhte ngaihtuah chuan a nep lutuk,” a ti a. “MNF party hi Pathian in tuaipui hmanga a tuai (chem anga chher hriam), chutiang lo kaltlang tawh chu a ni a, eng pawh hmachhawn ila mipuiten lo hlauthawng suh u,” a ti bawk.
Congress dinhmun sawiin MNF President chuan, “Serchhip bye-election kha thlirin CM bial hlun leh a bupui ah an candidate-in dahkham a chawi a nih kha. Kha khan a lantir chu an zam a ni. An candidate pawh halral thilhlanah an hlan a, party dang an vote vak a ni,” a ti a. ZPM pawh hman a mi ang an ni tawh lo nia sawiin, “Movement an inti a, Unit neih tul an ti lo, kalphung thar an ti, Kohhran hi kan Unit a ni mai an ti. Val Upa Council nen chiang taka sawrkar siam an tum a nih kha. Tunah chuan kha boruak kha a ni tawh lo. Party dang thovin an kal tawh,” tiin “Kalphung an thlak zing em em a. An kalphung ber chu sawrkar kheuh pawr tur dap a ni mai,” a ti a. Kum 2023 inthlanah Pathian leh mipui zarah MNF-in sawrkarna an chang ang tih sawiin, Congress chu under 5, ZPM under 10, MNF chu MLA 30 tlin tura a rin thu a sawi a ni.