Taxation Department Serchhip Zone in nikum ah chhiah vbc. 24.14 chuang an hmu

Taxation Department hnuaia Serchhip Zone chuan sawrkar kum liamta 2021-2022 chhung khan Chhiah chi hrang hrang Rs. 24,14,41,963/- hmuin GST kalphung ah sumdawng lian, State pawn-a bungraw la thin ten State pawn lamah GST an pek avangin Serchhip District mi in Chhiah an pek hi hei aia tam zawk a ni tih thawktute chuan an sawi.


Deputy Commissioner of State Tax, Serchhip Zone K. Lalrohluna chuan sawrkar kum liamta 2021-2022 chhunga Chhiah an hmuh dan hi LENKAWL hrilhin GST atangin Rs. 12,06,07,568/- an hmuh thu leh VAT atangin Rs. 7,79,42,822/- bakah Professions Tax atangin Rs. 4,28,91,573/- an hmuh thu a sawi a, hemi ang hian nikum chhunga Taxation Department Serchhip Zone in Chhiah an hmuh zawng zawng chu Rs. 24,14,41,963/- a ni tih a sawi. Chhiah an hmuhna tam ber chu GST a ni tih sawiin, amaherawh chu tuna GST atang an hmuh hi Serchhip mi in GST an pek zawng zawng erawh a ni lo tih a sawi a ni. Taxation Department hotute chuan GST kalphung ah Chhiah hi vawi khat pek niin sumdawng lian, State pawn atanga bungraw lalut thin ten an bungraw lakna State-ah GST hi an pe tih sawiin, hei hi Central sawrkar leh an bungraw lakluhna State ten 50-50 in an insem tih an sawi a, hei vang hian Serchhip-a sumdawng lian, State pawn atanga bungraw lalut thin ten an bungraw zuk lakna a GST an pek chu Central sawrkar leh Mizoram sawrkar in zat leh zat-a insemin hei hi an awmna State in GST an hmuh ah chhiar a nih thu leh District atanga Chhiah an hmuh ah erawh chhiar theih a ni tawhlo tih an sawi a, hei vang hian Mizoram State in GST a hmuh atanga engemaw zat chu Serchhip mi, sumdawng lian ten an pek a ni tih sawiin, amaherawh chu Serchhip Zone atanga Chhiah hmuh ah erawh chhiar a ni tawh lo tih an sawi a. Serchhip Zone atanga an hmuh bik chu an hnuaia GST Registration ti ten Monthly Tax Return atanga an pek a ni tih an sawi.

Serchhip-a Taxation Department hotute chuan VAT atanga Rs. 7,79,42,822/- an hmuh te hi Serchhip District-a awm Sipai ten Liquor/Zu atanga Chhiah an pek leh Mizoram pawn atanga tuialhthei la ten an pek a ni tih pawh an sawi a. Mizoram-a Oil latu zingah State pawn atanga lalut an awm thu leh Serchhip District-ah pawh pakhat, MIZOFED, Thenzawl an awm thu sawiin, heng te hian VAT an pek thu leh IOCL atanga la tam ber te chuan District dang ah VAT hi an pek thu an sawi.

Professions Tax pawh sumdawngte leh sawrkar hnathawk ten kum khat atan an pek thin a nih thu pawh Taxation Department hotute chuan an sawi a, hei hi hmun hrang hrangah an khawn thin thu leh Serchhip District mipuite pawhin an pek that thu an sawi a. He chhiah hi a tam ber ah Rs. 2500/- pek thin a nih thu an sawi bawk.

Taxation Department Serchhip Zone hi Deputy Commissioner of State Tax hova awmin Asst. Commissioner pakhat leh State Tax Officer (STO) mi 2 an awm mek a, heng bakah hian UDC mi 2, LDC pakhat leh thawktu dang mi 8 an awm mek a ni. Tunah hian mahni puala Office building la nei lovin mimal In luah hawhin Serchhip Bazar-ah an awm mek a, Staff Quarter erawh Khaw-tetlang-ah an nei tih sawiin, hei hi thawktu ten an luah mek thu an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar