Pa khawi dan zirhona nei

Agricultural Technology Management Agency (ATMA) Serchhip District hmalakna in Skill Training of Rural Youth hnuaiah nimin khan thalaite tan Pa (Mushroom) khawi dan zirhona neih a ni.


Horticulture Training Hall, Serchhip-a he training neih hi Serchhip District Horticulture Officer R. Lalrintluanga chuan hmanpuiin hetianga thalaite tana Pa khawi chungchang zirhona buatsaih a ni chu lawmawm a tih thu sawiin, an Department chuan mimal leh Pawl ho, Kohhran leh tlawmngai pawl te tan Pa khawi dan zirtirna hi an kalpui theih reng thu a sawi a, Serchhip District chu Pa khawina leh tharchhuahna hmunpui ah siam an tum thu a sawi bawk a ni.

He training hi ATMA Serchhip District leh Horticulture Department tangkawp in an buatsaih niin Serchhip DHO Office atangin Henry Saingura (Horti Asst), Lalnunngila (Tech/Mushroom), R. Lalduhawma (Sr. Horticulture Demonstrator) leh K. Lianhmingthanga (DHC) te chu Resource Person atan hman an ni a, Mizo-ram-ah kum 15 vel zet Pa khawi hi lo kalpui tawh a nih thu leh amaherawh chu chhan hrang hrang avanga kan la hlawhtlin theih loh thu leh a khawi dan kalphung tur dik tak hmanga Pa khawi hi kalpui a pawimawh thu bakah khawvel ah Pa khawi chu eizawnna tha tak a nih tawh thu te an sawi a. Mizoram in Pa kan ei atanga zaa 80 vel zet chu State pawn atanga kan lakluh a nih thu pawh sawiin, hei vang hian thalai ten Pa khawi chu eizawnna tling a ni tih an hriata an uar zel a pawimawh thu an sawi bawk a. Pa khawi dan hrang hrang leh enkawl dan bakah a hralh-chhuah lama hmalak dan te pawh he hunah hian sawiho a ni bawk.

He training hi Gregory Malsawmkima, Deputy Project Director, ATMA Serchhip District chuan kaihruaiin he hunah hian Serchhip khawpui chhung Veng hrang hrang atangin mi 15 an tel a, he training hi Vawiin ah chhunzawmin zawhfel a ni ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar