Swachh Bharat Mission (Urban) 2.0 kalpui dan tur rel

State Level Technical Committee on Swachh Bharat Mission (Urban) 2.0 thutkhawm hmasa ber chu nimin khan Directorate of UD&PA Conference Hall-ah neih a ni.

Urban Development & Poverty Alleviation Department hnuaia Swachh Bharat Mission (Urban) thawhkhatna chu a zawh tawh avangin Swachh Bharat Mission (Urban)2.0 kalpui tan a ni dawn a, hemi atana din State Level Technical Committee (SLTC) on Swachh Bharat Mission (Urban) 2.0 thutkhawm hmasa ber hi SLTC Chairman leh UD&PA Secretary K. Lalthawmmawia'n a kaihruai a, Finance-a Principal Secretary Vanlalchhuanga leh official pawimawh te telin Swachh Bharat Mission (Urban) 2.0 Mizorama kalpui zui zel dan turte sawiho a ni.

Swachh Bharat Mission (Urban) 2.0 hi Mizoram khawpui (notified towns) ah te kum 5 chhung (2022- 2026) kalpui a ni dawn a. Faina leh Thianghlimna ngawr ngawr bakah Solid Waste Management leh Used Water Management te a pawimawh dawn a. Kum 2026 ah chuan Mizoram Khawpuite hi ODF+ leh Garbage Free City nih tir vek tum a ni. Tunah hian Solid Waste Management Centre (SWMC) la awm lohna District lian zualah te SWMC dinna turin hnathawhna kalpui mek a ni a, khawpui dangah pawh SWMC hi neih theih vek tura ruahmanna siam a ni. SLTC hian an rawtna te hi State High Powered Committee (SHPC) hmaah an la pharh leh dawn a ni.