Rangva In chung neih vekna tur Scheme puang

Kum 2025 December thla ralhmaa Lengteng bialchhung In tinin rangva inchung an neih vekna tur 'Hlunsanga Malsawmna Scheme' chu nimin khan bialtu MLA L. Thangmawia chuan a puang.

Lengteng bial MLA Scheme thar, 'Hlunsanga Malsawmna Scheme' hi Lengteng bial atanga Mizoram Independent puan laia hming ziaktu (signatories) te zing ami Hlunsanga, Kawlkulh khua hming chawia ruahman niin he Scheme hnuaiah hian Lengteng bial chhunga rangva In chung la nei lo zawng zawngte bakah rangva In chung nei tawh, a thir a chhiat avanga a thenlai emaw, a vai emaw-a thlak ngai zawng zawngte kum 2025 December thla ralhmaa thlak sak vekna tur Scheme a nih thu bialtu MLA chuan a sawi a. He Scheme hi 2023 January thla atanga tan tur a nih thu leh 2023 chhungin a tlem berah Inchung 200 thlak a nih tur thu a sawi a ni. 

He Scheme hlawhtlin nan hian MLA Fund leh Mizoram Sawrkar Department bakah Corporate Social Responsibilities (CSR) atang te pawhin sum beisei a ni anga, Ngopa BDO leh Khawzawl BDO te kaihhruaina hnuaiah a tul angin Committee din chhoh a ni dawn tih bialtu MLA chuan a sawi bawk a ni.