Serchhip Police te tan ni 2 awh training neih tan a ni

Serchhip District-a Police te tan an hnathawh dan chungchanga intuaitharna atan ni 2 awh training chu nimin khan Serchhip-ah neih tan a ni.


Serchhip SP Conference Hall-a he training hawnna hi Serchhip SP Stephen Lalrinawma chuan hmanpuiin Mizoram-ah training chi hrang hrang neih thin a nih thu leh heng training te hi tangkaiin hlawkthlak thin viau mah se training thenkhat erawh a chhawrtu tur ten an chhawr tawk thin lo nia a lan thu a sawi a. Hei vang hian tuna training an buatsaih turah pawh hian Police a hna-thawk ten an tangkaipui ngei tur Subject hrang hrang thlangchhuakin he training hi buatsaih a nih thu a sawi a ni.

Serchhip SP chuan Police te chu pawi-khawihtu ten Dan anga hremna an hmuh theihna tura thawktu an ni tih sawiin, chumi atan chuan Dan an hriat a pawimawh avangin he training hi hlawk taka hman tum turin training a tel te hi a chah a. Quarter tin Training hi nei tura beisei an nih thu leh tun hi Quarter hmasa ber atana training a ni tih sawiin, neih chhunzawm zel tum a nih thu a sawi bawk.

He training hawnna hi Serchhip Addl. SP Vanlalnghenga chuan kaihruaiin Course Coordinator Inspr. H. Biakchhuma chuan training neih dan tur tlangpui a sawifiah a, Serchhip SDPO Kaste Romalsawma chuan lawmthu sawina hun hmangin training hawnna hun hi a khar a ni.

Ni 2 awh he training neih chhung hian POCSO Act hnuaia pawikhawihtu leh vanduaina tawkte buaipui dan te, pawikhawihtu sulhnu chhuina atana fingerprint pawimawhna leh hemi atana Police te hriat tur pawimawh te, thubuai chi hrang hrang chhui dan tura hriat tur pawi-mawh bakah Office inenkawlna atana pawimawh te Police hotu pawimawh ten zirtirna an pe dawn a, hei bakah hian Serchhip District Court atangin JMFC, Renee Lalremsiami MJS hovin inkawmhona an nei dawn bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man