I&PR Dy. Director in Serchhip-ah District huap kum 17 hnuailam Football-a intihsiakna a hawng

Serchhip District Junior (Under-17) Football Championship-2022 chu nimin khan Serchhip Sports Complex-ah khelh tan niin I&PR Deputy Director leh Serchhip District Information & Public Relation Officer (DIPRO) hna chelh mektu K. Saitluanga MIS chuan khuallian niin a hawng a ni.


He Football Championship hawnna hunah hian Serchhip DIPRO chuan Sports Association hruaituten kum naupang zawkte theihna thlirin beiseina sang tak nen 'Kan naute hi an la tha dawn' an ti thin tih sawiin, “Amaherawh chu insum theihna leh taihmakna kan tlakchham fo avangin rual u zawkte beiseina chu a hlawhchham leh thin,” a ti a, Pathian in theihna nasa tak pe mahse insumtheihna leh inpekna tak tak tlakchhamna avangin mi tam tak te an thamral thin chu a uiawm hle tih a sawi a. SDFA hruaituten beiseina sang tak neiin infiammi ten dinhmun sang zawk an thlen theih nana hautak tak chunga Tournament an buatsaih sak chu hmang tangkai a, an kalzelna atana inbuatsaihna bul tan nana hmang turin infiammite chu a chah a ni.

Serchhip DIPRO chuan tunlai ah mi thil ruk mai pawisaklohna a hluar hle nia a hriat thu pawh sawiin, rinawmna lamah kan inzirtir thar a tul hle tih a sawi a, diklo tak nawmsak ai chuan rinawm taka hrehawm deuh zawk pawh thlang ngam tura huaisen turin infiam mite a chah bawk. Hei bakah hian Social Media leh ti ti-na ah ram leh khawtlang hruaitute an thatna lam thu aia sawiselna leh diriamna hmuh tur a tam ta lutuk chu pawi a tih thu sawiin, tumah tha famkim kan awmloh thu leh kawng tha zawk inkawhhmuh zawnga inhrilhhriatna ni lo, mite fel tawk lohna pholang zawnga inselna hrim hrim lakah fihlim tum turin he huna kalkhawmte chu a chah a, infiamna kawnga an hlawhtlin theih nan insum a tulna kawng tinrengah insum turin a chah bawk.

Nimin-a he Football Championship hawnna hun hi Serchhip District Football Association President Zomuana Hnamte chuan kaihruaiin hri leng avanga kum 2 vel zet Tournament leh Championship nei mumal thei lova an awm hnuah kum naupang zawkte hmakhua thlir chunga hmalakna an kalpui tan leh tak thu a sawi a, tunhnai lawk khan kum 14 hnuailam te tana inelna neih a nih tawh thu leh tun tumah pawh kum 17 hnuailam te tana inelna hi buatsaih leh anih tak thu a sawi a ni.

Nimin atanga khelh tan he Football Championship-ah hian Team 13 telin heng te hi Group pali (4)-ah then an ni a, Serchhip khaw pawn atangin Keitum, Bungtlang, Khawlailung leh Hriangtlang atangin Team pakhat theuh an rawn tel a, karleh Thawhlehni, April 26 khian Final khela zawhfel hman tura ruahman a ni.

Comments

Popular News (Last 30 Days)

LPG man bithliah thar