Registrar of Marriage Annual Training neih a ni

Serchhip District chhunga Registrar of Marriage te tan kumtin-a neih thin an hnathawh dan chungchang inzirtir tharna chu nimin khan Serchhip Press Club-ah neih a ni.

Mizoram sawrkar Law and Judicial Department hnuaia Registrar General of Marriage buatsaih he zirhona neihpui tur hian Law and Judicial Department atangin Lalhmangaihsanga Sailo leh Lalhlimpuia te chu Aizawl atangin an rawn kal a, he huna kalkhawm Serchhip District-a Registrar of Marriage te chu an hna te theihtawp chhuaha a tha thei ang bera thawh tum tura chahin, harsatna an neih te an hnena zawt thin tur leh an hnathawh chu kawng hrang hrangah a pawimawh zel avangin fimkhur leh dik taka thawh tum turin an chah a. An hnathawhna atana tangkai tur hmanraw hrang hrangte pawh an pechhuak nghal bawk a ni.

Supreme Court thuchhuak ang leh chhan hrang hrang avangin Mizoram chhunga inneih te chhinchhiah ngei ngei tur a nih avangin Mizoram Legislative Assembly chuan Mizoram chhunga inneih te chhinchhiah ngei ngeina tur Dan, The Mizoram Compulsory Registration of Marriage Act and Rules, 2007 a siam a, he Dan hi Mizoram pumah April 1, 2008 atanga hman niin Serchhip District-ah hian Registrar mi 44 an awm mek a, he Dan hnuaiah hian Hnam, Chi leh Sakhaw hrang hrang ten anmahni tihdan leh chindan pangngai anga nupui/pasal inneih bakah nupui/pasal inneih lehna te pawh a huam a. Hemi hnuaia Certificate an pekchhuah te chu sawrkar Document hrang hrangah hman a ngai tawh bawk a ni.