Sawrkar School tam takah hming ziak an pung

School Education Minister Lalchhandama Ralte chuan sawrkar ah mipuiin rinna an nghat a, School luh tanni ah sawrkar School tam takah hming ziak an pung tih sawiin, “Hmasawnna lawmawm tak a ni,” a ti.

Tuivawl bial fanga zin mek Education Minister hian nimin zinga Sakawrdai VC House-a amah lo dawngsawngtute hma ah he thu hi sawiin, sawrkar School-a naupangte inziahluh dan hmun hrang hrang atanga report an dawn danin School tam takah naupang lut an pung a, hmun thenkhatah phei chuan School a leng lo khawp leh thutthleng leh dawhkan neihsa pawhin a daihloh khawp te pawh an awm thu sawiin, “Class Room zauh belh ngai te, hmun thenkhatah phei chuan Room sak belh ngaite an awm hial a ni,” a ti a. Sawrkar in zirna kawnga hma a lakna mipuiten an ring a, Enrolment a pung thut chu luhaithlak, lawmawm si a ni, a ti.

Hun kal tawhah sawrkar School-a lut tur naupang an tlem avangin School khar engemaw zat a awm tih Education Minister chuan sawiin, tun dinhmunah erawh chuan sawrkarin zirtirtu indaihlohna phuhruk nan a theih chin chinah zirtirtu a dah belh a, hei hian naupang tam tak a hip a, Sawrkar School a lun chho leh mek a ni, a ti a. Sawrkar School-a enrolment an pun avanga harsatna awm te khawtlang hruaituten lo enzuipui tur leh a theih ang anga School mamawh lo ngaihtuahpuia, an bialtu MLA te nen a tul dana zira a chinfel dan lo dap turin a ngen a, School thenkhatte phei chu a leta naupang pungte an nih thut avangin sawrkar tan pawh chawp leh chilha han chinfel mai buaithlak khawp te a nih thu leh School bulhnai Hall hman rih ngai te pawh a awm tih sawiin, a theih ang anga School naupangte len theih dan lo dap turin mipuite a sawm a ni.